EDITORYAL - Palamboa ang senior high school

Kun ang senior high school karon maglisud og pangita og trabaho tungod sa mga himilian nga kumpanya, samot na tingali kun upat lang ka tuig nga high school ang nahuman sa usa ka aplikante.

Sumala pa sa pagtuon sa usa ka education-based advocacy group nga Philippine Business for Eduction, 20 porsiyento lang sa 70 ka mga nag-unang kompanya dinhi sa Pilipinas ang modawat og gradwado sa senior high school.

Kani lang daan angay ng hinuklogan sa mga opisyales sa DepEd ug sa gobiyerno mismo, unsa kahay rason nganong ingon man niini ang tratamento aning mga kompanha.

Posibleng usa sa mga rason mao nga kuwang pa sa kamahoan o skills nga ilang gikinahanglan kining mga gradwado sa senior high school karon. Samot na tingali kun gradwado sa upat ka tuig nga high school, unsa may ilang nahibaw-an?

Inay nga wagtangon kining 10-anyos nga K to 12 education system, mas maayong palambuon kini pinaagi sa pagbutang sa curriculum ug mga pagtulon-ang aktwal nga magamit sa pangempleyo. Mga skills nga gipangita sa mga kompanya.

Pun-an ang mga laboratoryo, mga ekipo, makina, kompyuter, ug daghan pang uban diin makasuway gyud ug mabansay og maayo ang mga tinun-an aron maandam sila sa pagpanarbaho.

Dako kaayo og epekto ang pandemiya sa Covid-19 sa mga tinun-an tungod sa pagkubos sa kalidad sa ilang mga leksyon ug nakat-onan gikan sa online classes.

Kung wala pa tingali moigo ang pandemiya, mas daghan untang nakat-onan ang mga nitapos sa senior high school sa mga tuig 2021 ug 2022.

Dili tanang ginikanan makakaya pagpatungha sa ilang mga anak sa kolehiyo mao nga dako kaayo og matabang sa ilang pamilya ug sa ekonomiya sa nasud kun ang ilang mga anak bisan senior high school ray nahuman, makatrabaho gihapon.

Mao nga kinahanglan gyud nga himoan kini og paagi sa DepEd ug sa gobiyerno pagpalambo og maayo sa skills development sa kasamtangang senior high school karon.