Pagka NTF-ELCAC co-Vice chair ni Inday mipatibay

Samtang atua sa gawas sa nasod si Presidente Bongbong Marcos, si Vice President Sara ‘Inday’ Z. Duterte-Carpio mipatawag og unang panagtigom sa National Task Force to End Local Communist Armed Conflict (NTF-ELCAC) sa Malakanyang niadtong Mayo 10, 2023, diin miresulta ngadto sa bag-o ug dugang niyang resposibilidad isip co-vice chairperson sa NTF-ELCAC.

Sama sa iyang amahan, kanhi Presidente Rodrigo Roa Duterte, adunay hataas kasinatian si Inday diha sa pagbuntog sa mga insurhensiya nga binuhatan sa mga New People’s Army, sanglit pareho man sila nga na-mayor sa Davao City, nga kaniadto gilubgan-gisamoksamok sa mga teroristang walhon, kinsa hingpit nilang napahilom panahon sa ilang pagpamunoan.

Niay porsiyon sa mensahe ni VP Inday Sara: “We cannot let these things to continue. The so-called protracted war must end. And it must end now.”

Namatud-an na, nga kon unsay mga pulong mogawas gikan sa baba sa mga Duterte, ilang tumanon. Mga pagsaway, pagkontra o pagbabag sa ilang tumong nga alang sa kaayohan sa tanang katawhan dili makadulot sa daw puthawng kalig-on sa ilang political will. Sa laktod, walay hiwi nga makabawog sa ilang katul-id.

Kon si Inday mipasidaan nga tapuson na niya ang nagakahinayng mga NPA o teroristang grupo, iya gyod kining tinud-on. Ug dili siya mohunong hangtod iyang makab-ot ang kalamposan.

Mao kini hinungdan, may pipila ka pundok nga miagrabiyar nganong napun-an pa man og laing position si VP Inday nga Department of Education (DepEd) secretary na man siya? Adunay nanawagan nga dapat tangtangon na siya sa iyang pagka-DepEd secretary. Kay nanobra na kuno ang nahuptan niyang gahom.

Hinuon, kining mga reklamador, sulod ug gawas sa Kongreso ug Senado, nailhan nang miyembro o mga dumadapig sa mga kaliwang grupo, diin bisag kinsa pay ma-presidente sa Pilipinas, ila gyong samokon, guboton ug gub-on ang kahusay ug kalinaw sa atong nasod. Naandang trabaho nila nga dili na moobra human mamatay ang ilang gipaka-Ginoo nga Joma Sison.

Ug samot na, ning pagkatudlo ni VP Inday isip NTF-ELCAC co-Vice-chairperson, diin tanang miyembro inspiradong namahayag nga ang pagpakig-uban ni Inday kanila, sa ilang pagpakiggubat sa NPA nakapatibay. Nga maoy nakapahadlok sa mga yawyawang anino nga iyaha sa mga leftists.