“Sleeping cops”

Laing duha ka polis sa dakbayan sa Sugbo ang mag-atubang og imbistigasyon human mag-viral ang ilang video nga nangatulog sulod sa patrol car.

Makita sa video nga gi-upload sa Expose PH diha sa Tiktok ang patrol car sa Cebu City Police Office nga dunay body number 8. Diha sulod sa patrol car ang duha ka nag-uniporme nga polis nga pulos nangatulog.

Di maklaro sa video diin kini mahitabo apan sigun sa audio karon lang kining buwan sa Mayo.

Ug sigun sa babaye nga mabati diha sa video tulo na ka tuig niyang nabantayan ang gihimo sa mga polis nga iyang gihulagway nga mga tapulan.

Nanawagan pa ang babaye nilang Mayor Michael Rama ug sa bag-ong hepe sa kapolisan sa nasud nga disiplinahon ang duha ka tamaran nga mga polis nga miwaldas sa buhis sa katawhan pinaagi sa pag-usik og gasolina.

Tungod niini gimando sa hepe sa PRO-7 nga si Brigadier General Anthony Aberin ang pagpaubos sa duha ka polis sa imbistigasyon.

Lakip sa imbistigahon mao ang ilang hepe ug direct supervisor tungod sa command responsibility.

Ikaduha ning higayon sukad niadtong Enero nga dunay mga polis nga imbistigahon tungod kay nangatulog samtang nagduty.

Niadtong Abril 13 duha sab ka polis nga sakop sa Abellana Police Station ang nagviral human makuhai og hulagway samtang nangatulog sulod sa patrol car.

Ang duha nadistino nga magpatrolya apan miparada sa ilang patrol car  sa may General Maxilom Avenue og giingong nangatulog.

Makasabot hinuon ko niadtong duha ka sakop sa Abellana Police Station. Ug alang nako way dautan niadtong ilang pagpahuway samtang naghuwat og alarma. Ang importante wala sila mogawas sa ilang area of responsibility ug nagparada sila sa daplin sa karsada sa usa sa mga bantayanan nga dapit ubos sa ilang jurisdiction.

Apan lahi ang kaso niining duha ka sakop sa mobile patrol tungod kay matud pa nitago sila sulod sa usa ka pribadong luna aron mangatulog.

Bintaha nalang unta to og nagpabilin sila sa karsada ug gipaandar ang ilang blinker samtang sila nagpahuway ug nagpaabot og alarma tungod kay ang ilang presensiya diha sa kadalanan dako na og epekto aron pagbadlong sa mga kriminal nga nagtinguha paghimo og krimen.