Padayon ang hulga

Human sa subra sa tulo ka tuig, gilibkas na sa World Health Organization o WHO ang global health emergency batok sa Coronavirus Disease o COVID-19 nga mikutlo og milyones ka kinabuhi sukad sa paghapak niini niadtong 2020.

“It is with great hope that I declare Covid-19 over as a global health emergency,” matud pa ni WHO chief Tedros Adhanom Ghebreyesus ngadto sa mga mamamahayag sa headquarters sa maong ahensiya sa Geneva, Switzerland.

Ang paglibkas sa global health emergency sa COVID-19 naggumikan usab sa rason nga milurang na ang pagkatap sa maong balatian sa tibuok kalibotan. Nagpasabot lamang kini nga ang COVID-19 dili na seryosong hulga sa katawhan.

Apan bisan pa man niining deklarasyon sa WHO, dili gihapon kita angay mokumpiyansa. Sayod kita kon unsa gihapon ka bagsik ang maong balatian, nga mitakboy sa gatusan ka milyon sa halos tanang nasud sa kalibotan.

Gani nagkanayon si Ghebreyesus: “This virus is here to stay. It is still killing, and it’s still changing.” Iyang gi-estimate nga ang COVID-19 mipatay og 20 milyones ka tawo sukad kini mibutho gikan sa Wuhan, China kaniadtong 2019.

Ang Department of Health sa nasud nagpahimangno usab kanato nga pabilin kitang magmatngon batok sa Coronavirus Disease. Giawhag niini ang atong padayong pag-obserbar sa mga protocol aron kalikayan ang pagkuyanap sa maong balatian.

Sa rekord sa DOH, misaka kuno ang kaso sa COVID-19 sa nasud ning panahona. Hinungdan nga miingon si Presidente Bongbong Marcos nga dili layo ang posibilidad nga ibalik ang mando sa pagsul-ob kanunay og facemask.

Gilibkas man tuod sa WHO ang global health emergency apan magpabilin gayud ang presensiya sa COVID-19 sa kalibotan. Gani, tungod sa pagkamananakod sa maong balatian, kabahin na kini sa atong inadlaw nga pagkinabuhi ubos sa “new normal.”