Inyo ning adlawa, Tay

Pobre ang construction workers. Mangagisi na lang ilang sinina sa pagsige’g masa og semento ug kubalan na lang pag-ayo ilang mga kamot sa pagpunay’g bawog og kabilya, ilang suweldo pabiling gamay kaayo.

Mao nga luoy ang construction worker nga maospital. Magkapangkapangka intawon ang mga tagtungod sa pagpangitag tawong kautangan aron may magamit sa pagpatambal.

Akong anhing Tatay, kinsa natigulang na lang sa pagpanrabahog consruction, pagka-ospital niya, wala gyod magamit ang nadunot na lang niyang SSS card.

Kay walay klaro ang paghimog SSS contribution remittance sa iyang employer-contractor. Haskang demalasa!

Maayo gani, kay nakatrabaho na ko sa USC Registrar’s Office, Cebu City, niadtong higayona ug nakaaplay kog financial assistance loan sa among opisina nga dali rang giaprobahan.

31 na ka tuig ang nakalabay human mamatay akong Tatay. Kabos man tuod siya, apan daghang dagkong building ang iyang napabarog uban sa mga kanhi niya kauban sa buhat, kinsa sama niya, mga construction workers usab. Payag ra tuod ang ilang balay, pero gibuhatan nilag tag-as edipisyo ang mga adunahan.

Dili ko na mahikap ni magakos si Tatay. Pero, inig kakita nako sa USC gym diha sa may dalan Sanciangko ug sa Saint Francis Academy didto sa Balamban, Cebu, ang kadali ra gyong mabuhig balik sa akong panumdoman kadtong iyang pagpamawog og kabilya ug pagmasag graba, yuta ug semento, diin usahay mosobra pag 8 oras ang iyang pagpatulo’g singot lamang aron may ikapakaon namong iyang mga minahal.

Bisan didto sa Bacolod City, Dumaguete City ug Basilan, may mga dagkong bilding sab napabarog akong kugihang amahan.

Wala na tuod siya. Apan ang mga nahisgotang eskuylahan o edipisyo, hangtod karon nagpabiling nagbarog nga dakong himsog.

Mayo 1, 2023. Atong gisaulog ang Labor Day karon. Diin, gihulagway ang iyang simbolo og: kamot nga naggunit og martilyo, wrench, construction helmet ug tanang galamiton alang sa konstruksiyon.

Timaan, nga niining adlawa, girespeto sa tibuok kalibotan ang kakugihan sa mga construction workers, kinsa makonsiderar nga mga bayani.

Kay bisag gikastigo sa unfair labor practice, padayon gihapon ang grabeng pagkinayod-kakugi nga walay pagkunhod.

Kaninyong tanan, construction workers ug sa akong amahan nga mitaliwan na, inyo ning adlawa, Tay. You are all heroes. And Congratulations!