Unsay nahitabo sa Oplan Ratsada?

Samtang natanggong sa trapiko sa init nga kahaponon niadtong Biyernes, nasabod ang akong panan-aw nagkumbitay nga mga wire daplin sa karsada sa kinapusuran sa dakbayan.

Ug dayon hinay-hinay nga mipasunding sa akong huna-huna ang ultimatum nga gihatag ni Mayor Mike Rama niadtong Oktubre sa  miaging tuig ngadto sa pangulo sa “Oplan Ratsada”  nga si Konsehal Jerry Guardo.

Si Guardo nga maoy pangulo sa technical infrastructure committee sa Konseho sa dakbayan maoy gitahasan ni Rama nga manglimpiyo sa mga nagyongyong nga mga wire sa tibuok syudad.

Nahinumdom ko nga gihatagan sa mayor si Guardo hangtud sa Disyembre sa tuig 2022 pagkumpleto sa iyang tahas.

Human napupos ang ultimatum, nahilom ug wala na igdungog si Guardo hangtud nga niadtong miaging pila ka adlaw naghisgot napud siya paghapsay sa mga nagpasad nga mga tubo sa tubig.

Giduso niya nga mapasar sa konseho ang usa ka ordinansa nga magpugos sa MCWD paghimong moderno sa ilang mga linya sa tubig.

Iyang buot nga ipaduol sa MCWD ang distribution line niini ngadto sa mga panimay aron kuno malikayan nga magbad-ay ang taas nga kutay sa tubo diin ang uban niini anaa na mag-agi sa labihan ka hugaw nga mga kanal.

Way dautan sa tinguha ni Guardo. Apan hinaut nga mosunod ang lihok sa matagpulong nga iyang litukon.

Di ko gustong magduda sa iyang katakos ug abilidad apan gawas sa pasiatab diha sa media wa pay agi nga gipakita si Guardo.

Unsa may nahitabo sa iyang Oplan Ratsada, nganong hangtud ron daghan pa gihapon ang mga spaghetti wire sa syudad?

Kun niining maong kampanya palpak siya sa pagtiwas sa tahas, unsaon niya pagpugos sa MCWD nga ipaduol ang mga distribution line niini sa kabalayan nga mas kumplikado ang maong tahas sanglit naglambigit ni og mga right-of-way?

Unsaon nimo ang mga tag-iya og yuta kun di mosugot nga agian og tubo ang ilang luna?

Ang kampanya pagpanghipos sa mga spaghetti wire naghatag nato og pasiunang hulagway may padulngan ba o wa ang gitinguha sa mayor nga Singapore-like Cebu City.

Kun sa simple nga paghapsay sa mga naglukot ug nagyongyong nga mga linya sa kuryente wala ta siento porsiento nga nagmalampuson, unsa na kaha sa mas  kumplikado nga ambisyon?

Hinuon kun ang tumong sa pagpalutaw sa kampanya nga mahimong daw sama sa Singapore ang syudad igo lang sa pagdani og mga mga negosyante ug pagsipong og mga hinabang tingali nagmalampuson na ang mayor.