‘No permit no exam policy’ bill makaalarma
Naukay ang mga private schools niining pagpanday sa atong mga magbabalaod og Senate Bill 1359: ‘No Permit No Exam Prohibition Act’ ug House Bill 7584.
Diin, bisag dili makabayad ang estudyante sa iyang matrikula o monthly tuition fee sa ilang eskuylahan, mahimo ra gihapon siyang makaapil pagkuhag eksam bisag walay permiso. Ug silotan ang tunghaan nga dili motuman. Makalipay ba kini, o makasubo?
Natural, sa mga pobreng ginikanan, ikalipay gyod kini. Apan sa mga tag-iyag pribadong tunghaan, kinsa atua lang magsalig sa kuwartang gipangbayad sa mga estudyante aron makapadayon sa pagserbisyo, seguradong sila naguol pag-ayo.
Sa nanagpanday ning maong balaodnon, nindot unta nga gisul-ob sab ilang kaugalingon sa sapatos sa mga taga pribadong eskuylahan: gikan sa kinaubsang empleyado ngadto na sa kinatas-an. Nungkang, ang kahimtang ra sa mga estudyante maoy gitutokan. Buwahan, dili sila mahimong ‘unfair.’
Unsa kahay mahitabo sa eskuylahan kon kadaghanan sa ilang estudyante, kinsa bisan adunay ikabayad, tuyoon nga dili na magpakabana sa ilang obligasiyon. Sanglit, protektado man sila ning dili makiangayong balaod nga puwedeng abusohan ra pag-ayo sa mga bentahoso tang kaigsuonan?
Asa man magkuhag ibayad ang tag-iya sa tunghaan para isuweldo sa iyang tanang empleyado, para ipamalit og mga educational books, materials, equipments, etc. kon ang ilang panudlanan nga mao ray bugtong gisaligan sa tanan nilang galastohan, gamay ra or walay sulod? Dili ba mapugos na lang sa pagpanira? Asa na man lang mopaingon tanang empleyadong naapektohan? May trabaho bang giandam atong gobiyerno para kanila?
Ingkasog daghang pribadong eskuylahan ang manira, may pampublikong eskuylahan bang giprerapar ang mga senador ug kongresista nga kabalhinan sa mga apektadong estudyante? Basin bayag ilawom sa kakahoyan na lang sila magklase?
Sa dekalidad nga matang sa edukasiyon, dako kaayo’g nahatag ang private schools sa atong nasud. Dinhi nagagikan sagad ang nahimong mga dagkong lider sa Pilipinas. Busa, sama sa usa ka bililhong kahoy nga naghatag og mga laming bunga nga napahimuslan dili ra dinhi sa ato, kondili, sa tibuok kalibotan, angay lamang unta hatagan og dugang pang mga abuno aron molipang. Nungkang, buboag hilo aron mapukan.
Senate Bill 1359 ug House Bill 7584 makaalarma. Dili kini makatabang sa kawad-on. Makadugang hinuon.
- Latest