Nganong gibiyaan mo ako

Komusta na mga diehard supporters sa BBM-SARA Uniteam? Nagkahiusa pa ba, labi na kadtong vloggers, kinsa sa miaging 2022 election campaign period grabeng mi-exert og efforts aron lamang mapahumot pag-ayo ang milansar pagka presidente nga Bongbong Marcos (BBM)?

Panahon sa pagpangampanya, diin sa mga mainstream-social media interviews gipangutana si BBM kon iya bang ipadayon ang tanang proyekto-programa  ni Tatay Digong sama sa war on drugs and corruption, build-build-build, etc., dihang siya mipasalig nga iya kining ipadayon, naangkon niya ang makabungog nga kadaogan.

Ug natuman ba tanan niyang gisaad? Ang pagpamili niyag cabinet members nga sagad giyam-iran sa panilaw sa katawhan, ang kalit nga pagbaha sa ginadiling drugas, ang pagpamatay sa mga elected government officials, igo na kaayong makatug-an sa tinuod nga tubag sa maong pangutana.

Gumikan ning makahahadlok natong situwasiyon karon, daghang magtutuo ang kinasingkasing nag-ampo sa Kahitas-an nga unta tanan natong lider, gikan sa kinaubsan ngadto na sa kinatas-an, lamdagan sa Ginoo ang nahalandongan sa kangitngit nga pangisip ug ihatag ang diyosnong kahayag nga mogiya sa hustong dalan sa pagpangalagad.

Sumad karon, daghan nang Semana Santa ang nanglabay, diin inig abot sa Biyernes Santo, hasta kapila ibalikbalik ang pagpalanog sa Kataposang Pito ka Pulong ni Hesus, diin ang mga mensahe pulos nagtanyag og kaluwasan natong makasasala pinaagi sa pagbag-o na sa atong kinabuhi.

Apan unsa bay nabag-o sa nawong sa Pilipinas? Nahanaw na ba ang illegal drugs syndicates, smuggling ug korapsiyon? Or, migrabe hinuon?

Naguol ang atong Manunubos sa pagkagahig ulo sa tawo. Bisag gitanyag-tunol na Niya ang kaluwasan pinaagi sa Iyang pagpakamatay sa krus, ang mga lider sa atong nasud, wala g’yud modawat niini. Nagpabilin gihapon sa naandan nilang bulok.

Hinungdan, nga gusto pa untang pun-an ni Hesus ang Iyang pagluwas sa mga gahi. Apan miabot na ang kataposang adlaw nga gitagal sa Amahan nga maoy nagpadala-sugo Niya aron pagpanghatag og kaluwasan. Ug isip sinugong Anak, ang pagbuot sa Amahan maoy matuman. Busa, sa nahabiling yugto sa Iyang kinabuhi, si Hesus igo na lang mitiyabaw-tuaw: “Amahan ko, nganong gibiyaan mo ako?”

Ingon niini kita ka pinangga sa atong Manunubos. Gusto gyod Niya nga kita maluwas. Unya, ato ba lamang kining usikan?