Kalbaryo sa trapiko

Kalbaryo alang sa mga motorista paingon sa amihanang bahin sa Sugbo ang huot nga trapiko diha sa dakbayan sa Mandaue paingon sa Consolacion, usahay moabot pa gani hapit sa Liloan.

Apan sa miaging duha o tulo ka adlaw na mas nisamot pa ang gipas-an nilang kalbaryo tungod sa pagsirado sa bahin sa M.C. Briones St. diha sa Maguikay, Mandaue City.

Kinahanglang sirad-an ang maong bahin sa karsada tungod sa piligroso na nga skywalk. Ang kagamhanan sa Mandaue miguba sa skywalk aron kalikayan ang disgrasya ug samtang gihimo ang demolisyon sa maong istraktura dili sab kaagian ang naasoy’ng dalan.

Kini maoy hinungdan nga nibaha ang mga bagulbol diha sa social media sa mga motorista ug mga pasahero nga natanggong sa higante nga trapik.

Sa maong problema atong makita unsa ka mahinungdanon ang husto nga pagplano ug prioridad sa pagtukod og mga proyekto sa gobiyerno.

Ang nahimong hinungdan sa problema mao ang gubaon nga skywalk. Proyekto nga sa akong tan-aw pag-usik usik sa kwarta sa mga magbubuhis.

Minilyon nga gigasto pagpatukod sa mga skywalk dinhi sa Sugbo apan pila lang niini ang tinuod nga gikinahanglan.

Daghan sa mga skywalk gihimo nalang pinuy-anan ug kasilyas sa mga libudsuroy.

Ang minilyon nga gipatukod niini og gigamit pa pag-abli og dakong karsada nga magsilbing alternatibo nga kaagian gikan sa habagatan paingon sa amihanang Sugbo malikayan unta ang paghuot sa trapiko sa mga dakbayan sa Mandaue ug Sugbo.

Dunay north coastal road nga gitukod panahon ni kanhi presidente Gloria Arroyo apan hangtud ron wala gyud  makumpleto tungod sa problema sa right of way. Mas napahimuslan pa unta ang kwarta nga gipatukod niining mga way pulod nga skywalk kun gibayad sa mga luna nga naigo sa north coastal road.

Ang mga proyekto sa gobiyerno nga di mahuman tungod sa mga problema sa right of way nga moresulta hinuon sa laing problema sama sa trapiko nagpakita sa ka inutil sa mga ahensiya nga gitahasan sa pagplano.

Hustong plano ug prioridad sa mga proyekto importante aron malikayan ang samang kalbaryo nga nasinati sa mga motorista karon diha sa Mandaue ug sa mga kasikbit nga mga dapit paingon sa amihanang Sugbo.