Ipataas ang magpaubos

Kada bulan mopalit g’yud ko sa akong pang-maintainance nga medisina: synthetic ug organic. Sa wala pa ko moadto sa Cebu Ayala Center sa miaging Marso 23, 2023, midalikyat ko’g adto sa kanhi akong trabahoan human sa motulo na hapit ka tuig nakong pagretiro.

Nagtuo ko, nga usa na ka estranghero sa panan-aw sa kanhi akong mga kauban. Apan nasayop ko. Kay dihang nakasulod na, may misugat man kanakong officer ug mipahayag:

“Boss Jav, ang gibilin nimong trabaho ako maoy mipadayon karon.” Matud pa sa kanhi kong Pit Supervisor nga usa na ka acting Pit Manager. Nanglimbawot akong balhibo sa matang sa respeto ug pag-ila nila nako, diin mihirit kog ingon: “Abi kog I am already a stranger in this place.”

“Pwede ba diay na, Boss Jav? Kon unsay among pag-ila nimo kaniadto, mao usab kana ang among pagtahod nimo karon.”

Dili g’yud nila malimtan ang akong gihimo. Kay bisan kanhi akong posisyon naa sa itaas, nagpabilin man ko sa ubos  a akong pag-alagad kanila. Mao nga tinuod gayod ang nahisulat: “Ang magpaubos, ipataas.”

Miadto ko sa Mercury Drugs nga malipayon. Apan naunsa ba, nga human nako bayari ang tindera sa gipalit kong mga tambal ug nagpaabot na lang niini, may usa ka pirasong P1k nga ginuntingag kilid nga iyang giuli dungan ang pag-ingon: “Sir, imoha ni, Ilisi!”

Nakurat ko. Kay sa wala pa nako itunol kadtong akong gibayad, kaduha ko ipha ang pulos tibuok ug walay bisan usa nga may deperensiya. Unya, ngano man kini karon?

Kalma kong gipasabot ang tindera nga dili kini akoa. Pero hugtanon siyang miinster nga akoa g’yud kuno. Aw, bisan sakit sa dughan, ako na lang gidawat ug giilisan. Gialam-alaman na lang akong kaugalingon nga sulayan ko lang kinig pailis sa banko. Total, anaa bitaw’y Ginoo. Siya ray bahala ini.”

Ug makapahibulong. Kalit rang miingon ang cashier nga dili diay kuno akoa ang maong P1K. Nasakpan-subay na nila ang tinuod nga tag-iya. Busa, gipangayo nilag balik ang P1k diri nako ug gihulipan. Puwerteng nakapangayog pasaylo sa tindera ngari nako, nga dali ra sab nakong gipasaylo.

Laing kasinatian, diin gipabati Niya nako Iyang presensiya. Nga kinsa kadtong magpaubos Iyang ipataas.