The Lord is my shepherd

Bisan usa ka lapoy akong lawas nga usahay maabtan nag lawom gabii ayha pa matapos ang akong gihan-ay’ng artikulo para ning atoang lindog, gahinan gyod nakog panahon ang pag-ampo-litok sa tulo ka Amahan Namo, tulo ka Maghimaya ka Maria ug tulo ka Himaya sa Amahan ug ang pagpangayog pasaylo sa atong Ginoo sa dili pa matulog.

Nganong importante alang kanako ang maong tulomanon? Kini tungod kay nasulod sa akong kasingkasing kadtong gisulti sa Ginoo ngadto sa usa ka dakong dato, kinsa bisag daghan nag salapi ug bahandi, dili gihapon kontento, padayon gihapon ang pagkolekta-tigom, diin Iyang giingnan: “Hoy, buang! Karong gabhiona mamatay ka. Ambi, kinsay makasunod sa tanan mong natigom? Kini ang sangpotanan sa nagtumpitumpi sa katigayonan, apan wala madato alang sa Diyos.” (Luke 12:20). 

Ug gisuportahan ang kamahinungdanon niini, niadtong gihimo sa usa ka tulisan, kinsa bisan diha na sa  hilit sa iyang kamatayon, tapos nakaamgo sa tanang nahimong kasaypanan, mibalik sa atong Manunubos ug mapaubsanong mihangyo ni Hesus: “Ginoo, hinumdomi ako kon atua Ka na sa paraiso.” Diin, dihadiha Iyang gidala-uban.

Sa laktod, walay nasayod kanato kanus-a kita Niya kuhaon. Pero Siya mipruyba nga andam mopasaylo natong makasasala kon kinasingkasing lang mangayog pasaylo bisan diha sa kabugtoon nang yugto sa atong kinabuhi.

Rason, nganong nakat-on ko sa pag-ampo ug pagpangayog pasaylo Kaniya sa dili pa matulog. Kay sa tinuoray lang, niadtong tuig 2013 nga na-diagnose kog aplastic anemia, auto-immune disorder, thymus carcinoma ug uban pang makalilisang sakit, human ko magpahilog sa paring Indian, gisurender ko akong kinatibuk-ang kinabuhi ngadto sa atong Makagagahom.

Ug kay adlaw-adlaw na man kong mobasag ebangheliyo sa bibliya, ang tawhanong kahadlok nahanaw ug maoy mibanos ang kahimsog-kahugot sa espirituhanon kong pagtuo:  Nga: “The Lord is my Shepherd, there is nothing I shall want.”

Dinhay higayon sa akong pagkatulog nga nabati ko malipayong awit sa mga anghel nga nagbalikbalik sa paglaylay: “The Lord is my Shepherd, there is nothing I shall want.” Pagkanindot paminawon. Apan dihang mibukas akong baba aron moapil sa pagkanta, nakamata ko. Ug didto pa masayod-makita ang bugnaw’ng kahayag nga nanglusot gikan sa among bentana. Diay, buntag na!

Pagkatahom nga kasinatian. Sa pagbinuotan, makadugang!