Fly high pa, Kai

Misamot katahom ang karera sa dulang basketbol ni Kai Zachary Pertado Sotto, 20 anyos, ning iyang desisyon pagpasakop sa Hiroshima Dragonflies team sa Japanase G. League, isip import gikan sa Pilipinas, diin ang 7’3” niyang gitas-on, haom kaayo sa sentrong posisyon nga gisangon kaniya sa ilahang Amerikanong coach, Kyle Milling.

Sa tulo ka dula nga apil na si Kai, gipakita niya ang kalantip sa iyang opensa ug depensa gamit ang iyang gitas-on ug ang nagpahiping abilidad nga wala gayod gamita sa kanhi naagian niyang mga langyaw’ng coach, kinsa igo ra siyang patilawon og hamubong play time. Unya, dili pa pasahan og bola sa iyang buayang teammates bisag pabor na unta siyang maka-iskor.

Dili sama sa ilahang coach, kinsa mipabatig pagsalig ni Kai, nga maoy nakapa-boost sa moral sa mapaubsanong higante. Busa, sa tulo ka dula, diin daw gihimo siyang superstar sa kahigayonan, napagawas ang natago niyang kahait.

Ug binuligan sa iyang mga kauban, kinsa pasahan gyod siyag bola, tulo ka sunodsunod usab nga kadaogan ang naangkon sa ilang team: March 15 batok Kyoto Hannaryz (102-95) ug Marso 18 ug 19 batok Ibaraki Robots (90-72 ug 87-83).

Sa unang higayon, sa March 18 nga dula nila ni Kai batok Ibaraki Robots nakakudlit siyag double-double figures sulod sa Adastria Mito Arena: 21 points, 12 rebounds, 3 blocks ug 1 steal sulod sa 22 minutos.

Kini nagpasabot lamang, nga si Kai adunay nahuptang mga epektibong hiyas nga kon gamiton lang sa intelihenting coach, makahatag og dakong porsiyento nga sila maoy modaug sa dula.

Tinuoray, kulang pa sa kapaspas ang lihok ug ang kabahi sa lawas ni Kai. Sa NBA ang tanang players, six footer man o higante, daw mga kabayong mola managan ug sama sa kahoyng tugas ang kalawasan. Ug mao na lang kini ang kulang ni Kai.

Hinuon, sa height, nakabentaha daan si Kai. Gani, mao man kini gigamit sa ilang coach nga miresulta sa sagunson nilang pagdaug. Taas nag nalupad sa Kai. Pero kulang pa ang gitas-on niini.

Busa, fly high pa, Kai! Aron makatugpa ka sa prestihiyosong korte sa NBA ug mamahimong unang pyur Filipino NBA player nga matala sa dili malimtang kasaysayan.