Kinadak-an nga urom ni Duterte
Mahimo ra gyod unta nga matulog nga maghayang si kanhi Presidente Rodrigo Duterte sud sa iyang moskitero sa Sapphire St. sa Doña Luisa Village sa Davao City bisan sa kamatayon sa kapin sa 30,000 sa laktod nga pinatyanay sa iyang kampanya sa ilegal nga drugas:
·Siyam ka buwan na human napupos ang iyang termino pero way nangahas sa pagkiha niya sa lokal nga mga korte;
·Gi-imbestigar sa International Criminal Court (ICC) ang pasangil nga crimes against humanity batok niya pero si Presidente Ferdinand Marcos Jr. nipasalig sa pagdupa niya.
* * *
Pero nganong kinahanglan man nga magpalaban si Duterte sa iyang mga alyado sa Senado ug sa House of Representatives aron modalidali sa pagpasar og mga resolusyon sa pagpadayag sa ilang hingpit nga pagsuporta niya ug pagsalikway sa ICC?
Nganong kinahanglan pa man nga manghudlat ang iyang mga alyado sa gabinete nga dakpon ang mga imbestigador sa ICC o sa United Nations nga mosusi sa kapakyas sa gobiyerno sa pagpasaka og mga kaso batok sa mga responsable sa pagtanom og mga armas ug drugas sa mga biktima sa extrajudicial killings?
* * *
Mahimo ra gyod unta si Duterte nga magpahimulos sa iyang retirement, mangiyugpos uban ang pagsalig nga nakasabod siya og mga pabor sa militar, kapolisan ug burukrasya nga igong maka-garantiya nga may magbantay sa iyang mga interes.
Mahimo ra gyod unta siyang magpakahilom nga masaligon nga way balaod nga makadulot niya kay iyang anak ang ikaduhang labing taas nga opisyal sa nasud, nga dako og kahigayonan nga mao nay hawod sa Malakanyang lima ka tuig gikan karon.
* * *
Pero nganong kinahanglan pa man siyang magpalaban sa TV network sa laing pinangita sa balaod nga si Pastor Apollo Quiboloy aron pagpasidaan nga andam siyang magpakamatay aron pagpanalipod sa iyang kampanya nga niduhig sa inosenteng mga kinabuhi pero napakyas pagbungkag sa mga sindikato sa drugas?
Kinsa man ang iyang gipadungug-dungog? Si Presidente Marcos ba nga, human nipasalig sa pagpadayon sa iyang pakigsuod sa China, nigakos sa mga Amerikanhon nga nangisog sa pagpanalipod sa West Philippine Sea? Nabalaka ba nga, human nipasalig nga di na mobalik sa ICC, palabihon ni Marcos ang pagpahumot sa ubang kanasuran ug ilawog siya sa tirong?
* * *
- Latest
