Amahan, pasayloa sila

Luoy na kaayo ang kahimtang sa Pilipinas karon. Ang kanhi kadalanan nga bisan sa halawom nang gabii masinati ang kaluwas sa kahimtang sa mga mangagi, karon nahimo nang gikahadlokan tungod kay ang mga dautang elemento nga nanago-hanaw na unta panahon sa pagpamunoan ni Tatay Digong, karon ning pagka-presidente ni Bongbong Marcos, mibalik na usab sa pagdaghan aron ipadayon ang naputol nilang pagpakabuhi sa kangitngit.

Mga isnatser sa IT Park ug sa mga aseras ning dakbayan sa Sugbo nanungha na usab. Mga kawatan midagsang. Bisan sulod sa mga ahensiya sa atong nasod.

Gani, si Presidente Bongbong Marcos (PBBM) maoy nangunay pagdala sa Department of Agriculture (DA) kay matud niya, daghang korap ang nanaglihok niining ahensiyaha. Kinahanglang lingkoran niya kini aron mahatagag katumanan ang iyang gisaad, ang pagpabarato sa kilo sa bugas ngadto sa P20 na lang.

Pero naunsa ba, nga hasta presyo sa sibuyas bombay misulbong man hinuon ngadto sa P700-P800 ubos sa iyang pagbantay?  Diin, matod pa sa mialisngaw’ng tinubdan, igsuon ni First Lady Liza Araneta ang usa sa mga nahilambigit nga bigtime smuggler ning maong kontrobersiya.  Ug seryoso ba kining gituki sa Senado?

Niining bag-o, ang African swine fever (ASF) nahiabot gyod didto sa Carcar City, diin ang gipadalang opisyal sa DA nanghingusog ipatuman ilahang lagda bahin sa biochemistry para sa mga baboy, diin kinahanglang otomatik patyon ang nahisulod sa 50 radius gikan sa konpirmadong natakboyag ASF.

Pero isog kining gisupak ni Cebu Governor Gwendolyn ‘Gwen’ Garcia, kinsa adunay nakitang kakulangan sa mga paagi sa DA. Gusto siyang tinuon gyod pag-una nga nasakit og ASF ang hayop aron dili madamay sa pagpatay ang mga wala matapti, kay sa pamatyon dayon nga nagkahulogan lamang og dakong alkkanse sa hingtungdang hog raisers.

Thumbs up ko sa hugtanong pagsupak ni Gob. Gwen. Gusto niyang salbaron ang kapanginabuhian sa hog raisers.

Ug labaw sa tanan, aron makadaginot atong gobiyerno sa galastohang gigahin alang sa pagpakiggubat niining ASF.

Apan niadtong mga mikontra sa dalayegong desisyon sa gobernador, ning panahon sa Kuwaresma, diin giawhag Niya kitang tanan sa pagbag-o sa atong kinabuhi, intawon, patalinghugi ang Iyang gituaw-tiyabaw itaas sa krus: “Amahan, pasayloa sila kay wala masayod sa ilang gibuhat!”