Sige, strike lang mo

Unsay pagtuo ninyo, molampos kaha ang mga welgistang transport groups pagpugos ni Presidente Bongbong Marcos aron nga dili na idayon ang pagwagtang sa mga karaang PUJ?

Kon ako’y pangayoan og hunahuna, dili nako iratsada pagwagtang ang tanang matang sa karaang mga PUJ kay duna may daghan niini nga kapahimuslan gyud didto sa probinsya.

Kanang mga dagko nga matang sa PUJ, sama sa mga Elf nga gihimong pasaheroan, angay kini nga ipabilin apan adto na padaganon sa kalungsuran nga nihit pa ang mga sakyanan.

Kini hinuong mga multicab nga gikumbinar isip pasaheroan maoy dili na gyud angay’ng tugotan nga gamiton sa pagpamasahero kay makahasol kini sa mga sumasakay.

Tungod kay gamay man kaayo ang multicab, ug ang ubang sakyanan nga susama niini og desinyo, mag-abot ang masi’g ka tuhod sa mga pasahero nga mag-atbang sa paglingkod.

Ang tinuod, dili “constitutional rights” sa usa ka tawo nga makapanag-iya gyud og sakyanan nga pasaheroan unya sila maoy magbuot sa desinyo niini.

Ang kagamhanan dunay katungod sa pag-regulate kon unsa nga matang sa mga sakyanan ang tugotan nga gamiton sa pagpamasahero.

Gani, kon giestrikto pa sa kagamhanan, daghang public utility vehicles ang dili na gyud makadagan kay mga dunot ug wa lang tagda sa ilang mga tag-iya.

Kon dili idayon sa kagamhanan ang pag-ilis sa mga traditional jeepneys sa mga “modernized PUJs” dili kini makiangayon niadtong mga mituman sa lagda sa kagamhanan.

Mao nga angay gyud nga idayon ang kamandoan nga mga modernized jeepneys na ang padaganon, apan unahon lang nato diha sa mga dagkong siyudad, sama dinhi sa Metro Cebu.

* * *

Balikan nato paghisgot ang giingong transport strike sa mga misupak sa lakang sa kagamhanan paghulip sa mga karaang PUJ, kon gusto nila himoon kini nga dili ra kay usa ka semana.

Kusog kaayo moreklamo pero daghan pa sa mga driver sa public utility vehicles (PUV) mga kiat kaayo mopadagan og sakyanan diha sa karsada.

Gani, bisan og modernized PUJs na ang ilang gimaneho, apan kon magpadagan diha sa karsada mag-ikis-ikis ang dinaganan nga mora’g sila ra maoy tag-iya’s karsada.

Unya, kon madakpan sa paghimo og kalapasan sa lagda sa tukmang pagmaneho og sakyanan, pwerteng makahangyo, maghilak-hilak ug mag-drama nga dad-on atubangan sa mga inbestigador ang gagmay nilang mga anak aron kaloy-on ug dili na silotan.

Awhag nako sa mga sumasakay, hugot ta sa bakus ug dili kita mahadlok sa hulga niining mga driver nga gustong maoy modominar sa kagamhanan.