From tanim bala to pitas pera

Dili angay mokompiyansa ang mga kiriwag kamot nga anaa magtrabaho sa Ninoy Aquino Internation Airport (NAIA) o ubang ahensiya sa gobiyerno niining panahon, diin ultimog hangin nga moalisngaw gikan sa imong sampot mahimong ma-monitor na sa mapaniirong camera: ma-selpon man o ma-CCTV.

Sama sa makauulawng gibuhat sa mga taga Office for Transportation Security (OTS) personnel nga naasayin sa NAIA. Diin, ang ilang pagpangawat og kuwarta sa turistang Thai, nakuhaag video. Haskang paspasa napasapasa. Tibuok kalibotan, nasayod dayon!

Dili karon lang kini nahitabo. Kadaghan na. Ugaling lang, kay kada reklamo sa mireklamo nga nawad-an siyag kuwarta o mahalong butang sulod sa iyang bagahe, diin mo-request nga ipa-view-susi kini sa CCTV, modayon rag ingon ang naasaying kawani, nga walay kamerang nakamonitor.

Ug mao kini hinungdan, nga ang usa ka laing concered tourist, kinsa may ideya na ning maong modus, miseguro pagkuhag video sa mga kalihokan dinhi.

Tuod man, dihang mireklamo ang turistang Thai nga nawad-an siyag kuwarta sa pitaka nga gisulod sa iyang bag, unya igo rang gitubag sa mga naasaying OTS nga walay CCTV dinhi, mipakita gilayon ang concerned tourist sa nakuha niining video nga mirekord giunsa pagkawat sa maong mga personnel ang kuwarta sa Thailander.

Dako kining tamparos ngadto sa imahe ni Presidente Bongbong Marcos (PBBM). Kay samtang nagsige siyag suroysuroy-pangimbitar sa mga adunahang nasud gamit ang salapi sa katawhan aron sila mo-invest og negosyo sa Pilipinas, diha pa lang sa airport, labihan nang gubaa sa seguridad nga dapat maoy palig-onon pag-ayo sa nanagdumala sa NAIA.

Panahon ni PNoy Aquino, nauso ang tanim-bala sa NAIA. Hingpit kining nahunong dihang paglingkod-puli Tatay Digong mibahad nga iyang ipakaon ang mga bala sa empleyadong mibuhat niini. Apan subo paminawon, nga ning pagpamunoan ni PBBM, ang tanim-bala nahanaw tuod. Pero gipulihag pitas-pera!

Hangtod dili pangilisan ni PBBM ang mga gipang-appoint niyang cabinet members nga mga personal interest ray pirmeng gihunahuna (hinuon dili tanan) bahala nag unsay mahitabo sa katawhan, dili pitas-pera ra unyay modaghan.

Hasta illegal drugs business, corruption, smuggling ug uban pang daotang buhat mograbe usab paglipang. Ug mosamot nga dili niya matuman ang iyang gisaad sa katawhan nga: “Sabaysabay tayong babangon muli.”