Tulisan sud sa NAIA

Way tukmang pulong nga haom magamit paghulagway sa dakong kauwawan sa nasud nga gihatag sa mga kawani sa Office of Transportation Security (OTS) sa Ninoy Aquino International Airport (NAIA) Terminal 2  tungod sa ilang pagpangawat sa kwarta sa usa ka langyaw'ng pasahero niadtong Pebrero 22. Ang Thai National nga si Kitja Thabthim paingon na'ng mopauli sa iyang nasud dihang nabiktima sa mga kawatan nga kawani sa OTS diha sa NAIA.

Isip kabahin sa seguridad sa mga tugpahanan, ang tanang pasahero moagi gyud sa security check nga gidumala sa mga kawani ubos sa OTS.

Apan didto sa usa sa mga security checkpoints sa OTS diin kinahanglang moagi sa x-ray ang tanang bagahi ug butang sa mga pasahero nahitabo ang pagpangawat sa kwarta sa biktima nga mobalor og P8 mil.

Namatikdan sa biktima nga wa na ang iyang kwarta human moagi sa checkpoint hinungdan nga mireklamo siya. Unang nangulipas ang mga kawani nga nagdumala sa checkpoint.

Dili sab sila kapresentar og CCTV sa dapit diin gihimo ang checkpoint tungod matud pa blindspot ang maong dapit.

Swerte nga dunay laing pasahero nga nakamatikod sa gihimo sa mga kawani sa OTS og iya ni nga nakuhaan og video sa hilom.

Makita diha sa nagviral na nga video sa social media nga duna gyuy gikuha  ang usa ka kawani sa OTS gikan sa bag sa biktima ug gipasok sa bulsa sa iyang kauban.

Tungod sa video napugos ang mga kawatan pag-uli sa ilang kinawat ug nagpakiluoy nga papason ang video tungod kay daghan kuno siya og mga anak.

Di ni unang higayon nga nahitabo sa NAIA. Gani ang mga opisyal sa OTS admitido nga dunay labing minus unom na ka kaso sa pagpangawat diha sa tugpahanan nga naglambigit sa ilang mga kawani.

Notado ang NAIA sa mga ingon niini nga tinunto maong usa ni sa mga giilang "worst airport" sa kalibutan.

Ug abunda ang mga timailhan nga di ordinaryong operasyon sa mga kawatan ang naglihok diha sa maong tugpahanan.

Angayang paladman pa sa kagamhanan ang pakisusi niini tungod kay tataw nga dunay dakong sindikato nga nalambigit sa mga illegal nga kalihukan diha sa naasoy'ng tugpahanan.

Gikan sa pagpangawat og mga butang sa pasahero hangtud sa human trafficking. Nahinumdom mo giunsa pagpalusot diha sa NAIA ang mga pinoy nga nalambigit sa online scamming didto sa gawas sa nasud?

Ang kasayuran nga way CCTV footage didto sa dapit nga gihimo ang checkpoint makapaduda kaayo. Gituyo og pahaluna sa blindspot ang checkpoint aron way ebidensiya?

Dili ni angayang palabyon tungod kay munas ginhawa og paningkamot sa Sugboanong Secretary sa Department of Tourism nga si Christina Garcia-Frasco aron pagdapit og mga turista nga moduaw sa atong nasud.

Migasto og dakong kantidad ang gobyerno aron pagpromote sa atong nasud apan maguba lang ang imahin niini tungod sa mga kawatan diha sa NAIA.

Kinsa pa may turista nga ganahan moanhi sa Pilipinas kun inig-abot nila sa NAIA tulison sila sa atubangan sa mga kawani mismo sa tugpahanan?