Wow, ang galing!

Gidayeg nako ang kadagkoan sa Cebu City Police Office nga nakahimo og binag-ong pamaagi nga makakuha ka og National Police Clearance sa tumang kasayon diha sa lainlaing police stations.

Kining mao nga National Police Clearance katumbas kini sa clearance nga makuha nato gikan sa National Bureau of Investigation (NBI).

Kadtong mokuha og National Police Clearance para sa pag-renew sa ilang mga Firearms Licenses ug LTOPF, anha na lang mokuha sa mga police stations dinhi sa Cebu City.

Sa pag-apply nimo og clearance, kinahanglan ka nga mosu’d sa website sa PNP ug imong i-upload ang mga mahinungdanong detalyi sa pagkatawo sa applicant.

Pananglit og taga probinsiya ang mo-apply, pwede gihapon kay ang ilang rekord konektado man sa central record sa PNP. Kon may record ka, o kaha duna kay susama og nga’n nga may criminal case, makita sab.

Ang nakanindot lang sa PNP Clearance nga gitanyag sa Cebu City Police Office kay bisan og dunay “hit” ang imong rekord, makita dayon ang dagway sa tawo nga susama nimo’g ngan ug dunay daotang rekord.

Pareho nako, dunay susama nako og nga’n nga may kaso nga kriminal, apan may hulagway nga lahi ra kanako, mao nga gihatagan ra ko og clearance.

Sa NBI kay kon dunay “hit” pabalikon ka pa og usa ka semana kay susihon pa nila pag-ayo ang rekord. Unta ang NBI mohimo sa susama nga paagi nga gihimo sa PNP.

Ang pagkuha og PNP Clearance diha sa mga police stations sa Cebu City nga kantidad lang og P150, para lang ni sa “national clearance” pananglit kon mo-apply ka og lisensya sa armas ug uban pa nga kagamitan.

Apan kon mokuha ka lang og “local police clearance” pwede ra nga diha sa Campo Sotero Cabahug ka molukat.

* * *

Marso na, apan ang JFAP Construction nga maoy kontraktor sa MCWD pagladlad og mga tubo sa tubog gikan sa Busay paingon sa Lahug, wa gihapon makahuman. 

Ang rason lagi nganong dugay kaayo sila nga nahuman kay way mga nagtrabaho sa ilang mga project. Awhag nako sa kadagkoan sa MCWD nga ayaw na tawon mo pakigkontrata niini nga construction company uy.

Nahasol kaayo ang Cebu City government niining mao nga construction company kay kapin sa tuig na ang ilang proyekto nga wa mahuman.

Kamo nga mga sakop sa Bids and Awards Committee sa Cebu City government, timan-i ninyo kining mao nga kompaniya kay kon makigkontrata mo niini, mahasol gyud ta.

Bisan ang kadagkoan sa MCWD napikal na pag-ayo sa kalangayan niining mao nga construction company sa pagtuman sa ilang gikontrata nga trabaho.