Nakarehistro ka na?

Ang duha nako ka simpak sa akong cellphone, narehistro na ngadto sa akong network provider. Kamo diha, nakaparehistro na ba mo? Kon wa pa, kuyaw nga ma-deactivate na unya.

Gipahibalo sa Globe Telecom nga ang inyong mga Globe ug TM nga simpak, way bayad ang pagparehistro niana diha sa Globe online portal nga new.globe.com.ph/simreg.

Ang inyong mga Pre-paid nga Globe ug TM sim, Globe At Home Prepaid WiFi, Globe Mobile WiFi ug Globe Business prepaid customers iparehistro na.

Andama lang ang kompleto ninyong mga nga’n, birthday, unya ibutang kon babaye o lalaki ka ba, unya kumpleto nga address, ug pag-selfie nga maggunit ka og government ID nga may picture.

Apan kon dili kaayo ka makamao, pagpatudlo kay gilatid ra ba nga kinahanglang dili molapas sa 4MB file size ang picture nga inyong i-upload.

Pero kadtong mga senior citizens, persons with disabilities ug kadtong naggamit pa og mga keypad phones, apil na ang mga wala’y internet acces, ang Globe magbutang og assisted registration sa ilang mga opisina.

Busa, parehistro na!

* * *

Kon mahuman na ang BRT route ug makasugod na pag-operate ang mga bus rapid transit, sagitsit na lang unya ang pag-travel sa mga taga Talamban nga moadto og Bulacao.

Paspas kaayo ang biyahe sa BRT kay duna sila’y exclusive lane nga ilang kaagian nga dili mahimong agian sa ubang mga sakyanan.

Sa laktod, kadtong taga Talamban nga moadto sa Bulacao, mas maayo pa nga magsakay na lang mo og BRT. Pero samtang paspas ang biyahe sa BRT, siguradong makasugat og grabeng traffic ang ubang sakyanan.

Didto sa Colombia, epektibo kaayo ang BRT kay lapad man ang ilang karsada, dili sama dinhi sa Cebu City nga pwerteng gagmaya’g karsada.

Lupig lang ta sa Bacolod, Iloilo ug bisan na sa probinsya sa Guimaras nga pwerte ka lapad sa ilang mga karsada bisan og wa pa kaayo’y mga sakyanan nga nagdagan didto.

Tan-awon lang nato og unsay gama niining BRT dinhi sa Cebu City kay suportado man kini sa atong presidente nga gikatakda gani nga motambong sa ground breaking karong Lunes.

Usbon nako nga pabor ko nga adunay BRT dinhi, apan ang wa lang nako kaayo magustohi kay gipugos nila kini sa pagpatuman nga wa usa palapdi ang karsada.

Igo lang silang moingon nga bahala na og masakripisyo ang mga tag-iya og pribadong sakyanan nga magkalisud na pag-agi diha sa Escario Street kay ang karsada ibanan man og duha ka lane sa tunga para sa BRT.