Wage increase madaling sabihin
SA walong porsiyentong inflation rate na nagdudulot ng labis na pagtaas sa halaga ng mga bilihin, madaling ipanukala na itaas ang sahod ng mga manggagawa ngunit mahirap gawin. Tama naman ang panawagan ni Senate President Juan Miguel Zubiri sa mga pribadong kompanya na itaas ang sahod ng mga manggagawa.
Kung ako ay isang mambabatas, ipananawagan ko rin iyan dahil nagmamalasakit ako sa taumbayan na apektado ng nagaganap na inflation. Kasi kung hindi magsasalita ng ganyan ang isang opisyal ng pamahalaan, magmumukhang wala siyang malasakit sa bayan. Kaso, ito ay isa lamang pagpapahayag ng malasakit na mahirap ipatupad.
Kung ako ang may-ari ng kompanya, paano ko itataas ang sahod ng mga empleyado kung napakataas ng production cost? Mas lulubha ang sitwasyon kung malulugi ang mga kompanya dahil tuluyang mawawalan ng trabaho ang taumbayan.
Sa mga tanggapan ng pamahalaan, posible sigurong gawin iyan dahil may sapat na pananalapi. Ngunit sa mga negosyanteng umaasa lamang sa mark-up o tubo sa ibinebentang produkto, mahirap gawin ito. Wala naman tayong magagawa dahil ang inflation ay dulot ng mga pangyayari sa mundo na nakaaapekto sa pandaigdig na ekonomiya.
Pero may magagawa ang pamahalaan. Iyan ay kung masusugpo ang mga katiwalian lalo na ang pakikipagkutsaba ng mga tiwaling opisyal sa mga smugglers. Kahit may inflation kung mapupuksa ang smuggling at ang manipulation sa presyo ng mga kalakal, makaluluwag iyan sa lukbutan ng mamamayan.
Sa panig naman nating mga mamamayan, gumawa na tayo ng sariling diskarte para maragdagan ang kinikita natin. Sideline wika nga, basta legal at disente. Tayo ay nasa matinding krisis at naniniwala ako na sa bawat krisis na dumarating, palaging may kaakibat na magandang oportunidad.
- Latest