May permit kaha?

Gipasusi karon ni Cebu City Traffic Board Chairman Rico Rey Francis “Koko” Holganza kon may permit ba ang JFAP Construction nga mihimo og dagko kaayong lungag sa Veterans Drive sa Lahug.

Sayonan ka nga ang ilang lungag miabot gyud sa taliwa sa karsada, ug lisud na kaayo ang panagsugat sa mga sakyanan, ilabi na diha atubangan sa Marco Polo Plaza Hotel.

Nakasabot ko nga kinahanglan kaayo nga sila maglungag kay anha man ibutang ang Pressure Regulating Valve (PRV) aron mokontrolar sa pag-agos sa tubig paingon sa MCWD lines.

Apan siyaro na man pud, giabot gyud ngadto sa taliwa sa karsada. Unya ang sunod nga pangutana, mikuha kaha sila niini og permit?

Kon duna man sila’y permit, basin og gibutang nila nga anha ra sila maglungag daplin sa karsada, ug wa iklaro nga ang dako nilang lungag moabot sa taliwa sa karsada nga makabalda sa traffic?

Kanang dapita atubangan sa Marco Polo Hotel, dili gyud mahimong masugatan og duha ka sakyanan mao nga makamugna gyud og traffic kay magbanus-banos man ang mga sakyanan pag-agi.

Unya, hinay ra ba kaayo ang pagtrabaho nila kay maihap lang sa tudlo ang ilang mga trabahador.

Husto gyud si Chairman Holganza nga dili na maayong hatagan og kontrata kining JFAP Construction. Abi ninyo, P115 Milyones ning ilang kontrata sa MCWD apan ila ra nga gilangay-langayan.

* * *

Miadto ko sa Cordova kaniadtong Sabado kay gitambongan nako ang “Team Building” sa mga sakop sa Lupong Tagapamayapa sa Barangay Apas.

Duol na lang gyud ang biyahe paingon sa Cordova kon anha ka moagi sa Cebu-Cordova Link Expressway (CCLEX), kay dili ka naman ma-traffic sa Mandaue ug Lapu-Lapu City.

Kay didto man ko miagi sa Mandaue, unya ngadto na sa Lapu-Lapu City, dayon na sa Cordova, aw pwerteng dugaya gyud nako nga miabot.

Pagtangka gyud nako sa utlanan sa Cordova, nakit-an na nako ang eskina paingon sa CCLEX. Nakaingon ko nga sus, dalia ra unta nako nga miabot kon sa CCLEX pa ko miagi.

Para nako, way sapayan kon mobayad pa kita og P90 sa pag-agi sa CCLEX kay dili ka naman malangay. Apan ang isugyot nako nga unta, dalion gyud sa CCLEX ang pagtukod sa sanga nga sa tulay paingon sa direksyon sa siyudad.

Karon gud, medyo malangay pa gihapon og gamay ang biyahe kay kon gikan ka dinhi sa siyudad, ug gusto ka nga moagi sa CCLEX paingon sa Cordova, motuyok ka gyud usa sa South Coastal Road ug kinahanglan pa nga moadto ka habig sa Inayawan aron makatuyok ug makabalik ka paingon sa CCLEX.