Kailan ihahayag ng DILG ang mga sangkot sa drugs
KAILAN kaya ibabandera ni DILG secretary Benhur Abalos ang mga heneral at colonel na may kinalaman sa pagpapakalat ng droga sa bansa. Ninety percent na sa mga heneral at colonel ng Philippine National Police (PNP) ang nagsumite na ng kanilang mga resignation. Kaya naghihintay ang mamamayan kung sino ang mga PNP officials na sangkot sa drug trade.
Habang tikom ang bibig ni Abalos, sunud-sunod naman ang pagkaaresto at pagsamsam ng droga ng National Capital Region Police Office (NCRPO) sa ilalim ng liderato ni MGen. Jonnel C. Estomo.
Noong isang araw, naaresto ang dalawang miyembro ng Yang Drug Group na nag-ooperate sa Makati City, Muntinlupa City, Pasig City, Pasay City at Taguig City. Ang mga suspect ay nakilalang sina Kun Yang at Yang Tao Nahuli rin ang kasapakat nilang si Faith Jovenes Suniga, alias ‘Nina/Trixie. Nasamsam sa mga ito ang isang kilong shabu na nagkakahalaga ng P1,200,000. Nasamsam din sa mga ito ang 9.5 grams ng marijuana “kush”, 62 pieces ng small round tablets at 38 pieces ng Chinese Magoo/Magu.
Kung nakalusot ang mga droga, marami na naman ang magugumon dito at magkakamal naman ng limpak-limpak na salapi ang tatlong suspect. Pero hindi sila nakalusot sa mga awtoridad. Natapos ang pamamayagpag ng mga miyembro ng Yang Drug Group.
Ayon kay Estomo, “Ang NCRPO ay patuloy sa paglulunsad ng mga operasyon laban sa mga criminal na gaya ng mga dayuhan na ito. Hindi kami titigil at mapapagod na magsagawa ng mga operasyon upang tuldukan na ang matagal na problema sa ilegal na droga at bigyan ang ating mga kababayan ng isang maayos at payapang komunidad.”
Ganito ang dapat gawin ng PNP officials sa taumbayan hindi yung ningas kugon lamang ang ipinakikita. Kapag nakatikim ng salapi ang ilang dayukdok na opisyales ng PNP, nakakalimutan na ang maglingkod nang tapat sa mamamayan.
Kaya tama si Abalos na paimbestigahan ang ilang dayukdok sa PNP upang hindi na sila pamamarisan. Pero sana ilahad o ibunyag na ni Abalos ang mga PNP officials na sangkot sa illegal drugs.
- Latest
