Imposible nga aprobahan

Kon aprobahan sa Regional Tripartite Wages and Productivity Board (RTWPB) ang gipangayo nga dugang usbaw sa suholan sa mga mamumuo, mahimo na nga kapin sa P700 ang minimum wage.

Husto baya ang Cebu Labor Coalition nga gamay ra kaayo ang P435 nga minimum wage dinhi sa Metro Cebu tungod kay pwerte ang pagsaka karon sa prisyo sa mga palitonon, nga naglakip sa mga pagkaon.

Apan paputol ko’s liog kon aprobahan sa RTWPB ang gipangayo sa Cebu Labor Coalition nga pun-an og P292.50 ang P435 nga inadlaw’ng suholan dinhi sa Metro Cebu.

Malipay ko kon aprobahan, apan makuli kaayo kini nga mahitabo. Malantawan nako nga pwerteng daghana kaha nga mga trabahoan nga mosirado sa ilang negosyo.

Mahimong mouyon ang RTWPB nga dugangan ang minimum wage, apan dili ingon niana kadako nga kantidad.

* * *

Mokusog na unya ang presyor sa tubig sa mga gripo diha sa Talamban ug kanait nga mga lugar kon mahuman na ang proyekto sa JE Hydro Bio-Energy Corporation nga pagkutay og dagkong mga tubo sa tubig diha sa Talamban.

Wa gyud maglangan ang Cebu City Traffic Management Board paghatag og pagtugot nga ang JE Hydro tugotan nga sila makakutkot daplin sa karsada gikan sa Talamban Gym subay sa Gov. Mariano Cuenco Avenue paingon ngadto sa eskina sa Cabancalan, Mandaue.

Kumpiyansa kaayo ang Traffic Board kay ang JE Hydro maayo og rekord, dili sama sa laing kontraktor nga gikuha sa MCWD alang gihapon sa pagkutay og dagkong mga tubo sa tubig diha sa Busay paingon sa Lahug nga pwerteng hinaya motrabaho.

Mao nga awhagon nako ang kadagkoan sa JE Hydro nga gipangulohan ni Engr. Joffrey Hapitan nga ayuhon gyud nila ang ilang proyekto nga dili makabalda sa pag-agi sa mga sakyanan.

Kini aron nga sa sunod nila nga pagpangayo’g permit gikan sa Cebu City Traffic Board, dili gihapon magpanuko paghatag ang mga sakop niini.

Abi ninyo, gitug-anan ko ni Engr. Hapitan nga duna sila’y laing “major water project” sa bukid nga target nilang maserbisyohan ang mga nagpuyo sa bukirang barangay.

Pagka nindot sa plano ni Engr. Hapitan. Hinuon, ang JE Hydro igo lang mangita’g tubig nga ikasuplay ngadto sa MCWD, ug ang MCWD na maoy mobaligya niini ngadto sa mga konsumidor.

Ang nakabentaha niining tubig sa JE Hydro kay pwede mainom, ug aron pagmatuod niini, bisan si Engr. Hapitan ug si Atty. Joey Daluz nga maoy chairman sa MCWD, miinom gyud sa tubig sa JE Hydro nga direkta gikan sa gripo.