Happy Valentines!

Daghan pa kaayo ang wa makasabot sa tinuod nga kahulogan sa pagsaulog sa Valentine’s Day. Ang uban nagtuo nga mao kini ang adlaw nga ang maghigugmaay manulod sa motel.

Lainlain ang mga sinuwat ngano nga namugna kining Valentine’s Day, dili na lang nako tagsa-tagsaon pagsaysay ninyo kay mosamot na nga maglibog na ta.

Ato lang hunahunaon nga kining pagsaulog sa Valentine’s Day, mao kini ang adlaw nga kitang tanan magminahalay ug magrespitohay unta sa usa’g-usa.

* * *

Tungod sa seryoso nga tinguha ni Cebu City Mayor Michael Rama nga mahimong susama sa Singapore ang Cebu City, gibisitahan siya sa ambassador sa maong nasud kagahapon.

Miadto gyud si Singapore Ambassador to the Philippines Gerard Ho Wei Hong sa opisina ni Mayor Rama ug nakighinabi sa mayor ang opisyal sa Singapore.

Gipadayag niini ang dako niyang kalipay nga si Rama nakadayeg kaayo sa kamalamboon sa Singapore ug maoy rason nga gusto niya kining mao usab ang mahitabo sa siyudad.

Dunay miingon nga lisud masunod ang Singapore kay dihang gisugdan ang pagpalambo sa maong nasud, lahi nga matang sa pangagamhanan ang gipatuman.

Sayonan ka nga didto sa Singapore, kon masakpan ka nga bisan mangluwa lang sa karsada multa ka na. Dinhi sa ato, makita nimo nga ang mga tawo pataka lang og labay sa ilang mga sagbot.

Pero tabangan nato ang mayor aron makab-ot ang gipangandot nga kalamboan sa atong siyudad sa umaabot nga katuigan.

* * *

Dunay gipublikar nga hulagway sa usa ka on-line news nga pwerteng punoa sa mga pasahero ang usa ka modernized PUJ nga nagbiyahean sa Consolacion paingon dinhi sa siyudad.

Pwerteng daghana sa mga nagbarug nga pasahero, ug sigurado nga dul-an tingali kadto sa 20 ang nagbarug.

Ang Land Transportation Franchising and Regulatory Board mitugot lang nga lima ang katugotan nga magtindog. Kami sa Traffic Board sa Cebu City mitugot nga mahimong pito ang magtindog. 

Apan ang pangutana, duna bay mga mo-check-up sa mga modernized PUJ, sa mga bus nga milapas sa kamandoan nga gihatag ngadto kanila?

Nganong gidili man ang pagpasakay og subra kaayo nga pasahero? Usa nga rason niini kay kon maaksidente, dili na mobayad ang insurance sa subra nga gidaghanon.

Inigpa-insured niini ibutang na kon pila ra ang gitugot nga pasahero, ug kon subra niini ang sakay, dako na nga lantugi sa insurance company.

Apan menos og kapoy ang magtindog nga pasahero diha sa mga modernized PUJ ug bus, kon itandi nimo sa karaang PUJ nga magtuk-ong ka.