UC maayog mga estudyante

Bata pa ko, sikat na ang eskuylahang Cebu Central Colleges nga ginganlan og University of Cebu na karon tungod sa gitanyag nga mga kurso sa Nautical ug Marine Engineering.

Kadto akong Tatay Andot, construction worker, inig agi namo sa dalan Sanciangko, diin may makita kaming mga estudyanteng pulos nagsul-ob og puting uniporme, moingon dayon: “Na’ay, nindot kaayong kursoha, Dong. Kay sa higayong makasakay kag barko, dinagko ang suweldo.”

Amo man gong silingan, kinsa anak og mamaligyaag tinap-anang isda, dinhi ning maong eskuylahan migraduwar sa kursong Marine Engineering, kinsa sa ilang licensure board exam, pasar dayon ug dali rang nakatrabahog barko. Busa, luho ang pamuyo.

Akong pobreng amahan, kinsa maglisod nako pagpaeskuylag kolehiyo, kutob na lang intawon sa pangandoy nga kaanindot kon mahisama ko sa anak sa among silingan.

Wala ko matuman ang mao niyang damgo. Pero maoy mitubos ang anak sa akong igsuon, kinsa pinaagi sa Norwegian Scholarship Program sa UC, migraduwar ‘Magna Cum Laude’ sa kusong Marine Engineering. Unya, usa ka tuig kapin pa lang sa pagsakay’g barko, nakapalit dayog bag-ong sakyanan ug nakaangkon og house and lot.

Dinhi, nakaingon kong kaanindot diay sa UC. Sanglit, sagad sa ilang produkto, sama sa among silingan ug akong pag-umangkon, sila nagmalampuson man gayod.

Bisan mga kompaniya o hotels, nakadayeg sab sa UC. Ako mismo, gitug-anan sa F&B manager sa usa ka 5-star hotel, nga sa higayong mo-request ang mga unibersidad nga anha sa ilaha ipa-train ang mga HRM students, maoy hatagan nilag unang prayoridad ang taga UC. Kay dili kuno arte, unya kugihan motrabaho-sunod sa unsay ilang itudlo.

Mao nga dihang dunay duha ka tinun-ang nars: Angyl Fayth Ababat ug Kristianne Joice Ona nga miluwas sa tinderag prutas, kinsa giabis ang liog sa nangabubhong kapuyo, pagkasayod nako nga sa UC-Banilad sila nagtungha, wala na ko mahibulong sa ilang pagkamatinabangon, diin gisugal ilang kaugalingon aron lamang pagsalbar sa himalatyong kinabuhi.

Tungod kay ang paglumbaanay sa atong mga lider sa kapolisan ug LGUs pagtunol og daghang pasidungog ngadto nila ni Angyl ug Kritianne, igo nang momatuod nga ang UC, tuboran diay sa mga maayong estudyante. 

Atty. Go, UC family and faculty, thumbs up kami!