Mga tunob gibilin ni ‘Mon’ Sr.

Ramonito ‘Mon’ Rosal Sr. ang tinuod niyang pangalan. ‘Mon’ ang tawag namo niya sa among trabahoan niadtong wala pa ko moretiro. Sa Security Department siya nadestino. May taas-taas ranggo. Pero mapaubsanon. Kon may masayop, maymayan. Ug dili kasuk-an.

Segun sa akong mahinumdoman (kon wala ko masayop, ha?) rekomendado siya ni anhing Cebu Archbishop Emeritus Ricardo Cardinal Vidal sa iyang pag-aplay og trabaho. Ingon niini ka pinangga si Mon sa cardinal. 

Kon ngano? Ulahi na kong nasayod nga si Mon dugay na diay'ng nagsilbe sa San Nicolas de Tolentino Parish Church, 70 Candido Padilla Street, Cebu City isip Sacristan Mayor. Ug tungod sa iyang pagkamaayong tawo, nahimo siyang pinangga sa mga altar server ug uban pang mangangalagad sa simbahan.

Tiaw bay, bisag nagnihit kuno iyang bulsa, paningkamotan gyod niyang makapakaon sa iyang mga kaabag sa buhat sa mga panahon nga sa iyang tan-aw, kini gipanggutom.

Lahi sa usa ka hitabo nga giasoy ngari nako sa usa ka mangangalagad sa laing parokya, kinsa mitug-an nga naluoy kuno siya sa ilahang altar servers. Kay tungod walay kaon nga i-straight misilbi'g mga misa, nangadto kuno sa kombento, nangayawat kon duna bay sobrang pagkaon sa mga pari. Apan imbes pakan-on, gibugaw-kasuk-an pa hinuon sa pari. Pastilan, no, kon tinuod man gani?

Bilib ko ni Mon. Kay sama ni Hesukristo, iyang gipakaon ang daghang tawong gipanggutom.

Mao diay, nga bisag panahon sa iyang day-off mamaligya siyag Charity Bingo tickets aron lang makakomisyon nga iyang ikapaambit dili para lamang sa iyang pamilya. Kondili, hasta sab ngadto sa mga mas pobre pang nanginahanglan.

Ang kadaghan sa bulak nga nag-alirong sa haya ni Mon sulod sa San Nicolas Knights of Columbus Chapel, ang kadaghan sa miduaw-tambong, ang kaparian nga kada adlaw mihalad og misa, ug niadtong mga pari, kinsa mitunghag ala 1:00 sa kaadlawon aron magresponsoriyo, igo nang momatuod unsa siya kaduol ug kamahal sa katawhang nakasaksi ug gipangtandog sa iyang pagkabuotang mangangalagad?

Matang sa legasiya nga naglangkob sa mga bulawanong tunob nga iyang gibilin dinhi sa yuta, mga tunob nga kapanaminan natong nahabilin.

Dili na nato siya makita. Pero ang iyang mga langitnong binuhatan? Magpabiling buhi sa mga dughan.