Di tiaw ang pressure

Gibuksan pagbalik sa International Criminal Court (ICC) ang ilang imbistigasyon sa pasangil nga naghitak ang paglapas sa tawhanong katungod atol sa dugong kampanya sa administrasyong Duterte batok sa illegal nga drugas.

Matud sa ICC di seryoso ang gobiyerno sa Pilipinas pag-imbistigar sa mga pasangil nga nakalapas ang mga awtoridad sa tawhanong katungod sa mga civilian nga gidudahang nalambigit sa illegal nga negosyo sa drugas.

Ang desisyon sa ICC nakasugat dayon og pagsupak sa kagamhanan sa Pilipinas kansa dili buot nga manghilabot ang international court sa internal nga problema sa nasud. Ang secretary sa Department of Justice (DOJ) nga si Crispin Remulla miingon nga way personalidad ang ICC nga moimbistigar tungod kay dili na miyembro ang Pilipinas sa Rome Statute.

Si kanhi Presidente Rodrigo Duterte, kinsa maoy gipasanginlan nga utok sa dugoon nga kampanya batok sa illegal nga drugas, mihukom sa wala pa mapupos iyang termino nga dili na mopasakop ang Pilipinas sa ICC.

Ug way plano ang administrasyon ni Presidente Bongbong Marcos nga mobalik pagpasakop.

Sa laktud maglisod ang mga imbistigador sa ICC paghimo sa ilang pakisusi kun dili mokooperar ang atong gobyerno. Kini maoy hinungdan nga ang ubang mga opisyal, labi pa ang mga sakop sa oposisyon, nanawagan sa administrasyong Marcos nga makig-alayon sa mga imbistigador sa ICC.

Tungod kay suod ug alyado sa politika si Marcos ug Duterte imposible nga motugot ang kasamtangan nga administrasyon sa imbistigasyon sa ICC. Dako og utang kabubut-on si Marcos ngadto sa mga Duterte. Dili mabalik si Marcos sa Malacañang kun dili tungod sa mga Duterte.

Kun wala mosugot si Bise Presidente Sara Duterte nga makigtandem kang Marcos hayan siya maoy naglingkod ron sa Malacañang.

Angayan hinuon nga timbang-timbangon og maayo sa administrasyong Marcos ang sunod nilang mga lakang kabahin niini tungod kay dili tiaw ang mahimong pressure gikan sa international community. Kun magmagahi gyud ang kagamhanan dili layo nga ma-isolate ni sa kumunidad sa mga nasud.

Dili sab ikalimod nga duna gyuy mga nahitabong patay atol sa kampanya batok sa illegal nga drugas nga medyo kadudahan ang mga sirkumstansiya. Daghan sab sa mga patay wala pa gyud mahatagi og kasulbaran sa mga awtoridad.