Daghang wa mamayad

Ang Cebu City government nakakolekta og kapin sa P1.2 billion nga business tax sa mga negosyante nga mibayad niini gikan lang sa Enero 2 hangtud sa katapusan sa buwan sa Enero.

Nagtuo man gani ko nga kon hingusgan pa gyud sa mga kawani sa siyudad ang pagpangolekta sa business tax, dili ra kay kana ra nga kantidara ang ilang makolekta.

Timan-i nga ang P1.2 billion nakolekta gikan ra sa mga magpapatigayon nga mibulontaryo pag-adto sa “One-Stop-Shop” sa City Hall nga gibutang sa usa ka mall dinhi sa siyudad.

Dili ikalimod nga pwerteng daghana nga mga magpapatigayon nga wa gyud mamayad og buhis, ug unta kana sila maoy kampanyahan sa City Hall aron mobayad gyud sila.

Law-ay kaayo tan-awon nga ang ubang magpapatigayon reliheyoso kaayong mobayad sa ilang buhis, samtang ang uban diha nagkatawa ra kay wa sila magbayad.

Angay gyud sila nga mohayad og buhis kay apil man sila nga giserbisyohan sa siyudad pinaagi sa paghakot sa ilang mga basura, gipasigahan og suga sa poste ang ilang palibot nga ang siyudad ang nagbayad.

Asa man og ibayad ang siyudad kon ang ubang mga buotang magbubuhis mosundog kanila nga dili na usab mamayad og buhis?

Unta, si Mayor Michael Rama magmugna pagbalik og Tax mapping team aron nga mosuroy sa lainlaing dapit ug ilhon kinsa kadtong wa magbayad og buhis.

Para nako, bisan og dili unta usbawan ang bayranan sa buhis sa real property dinhi sa siyudad, basta ayuhon lang sa pagkolekta ang mga buhisanan, makab-ot man gyud nato ang P50 Billion nga gisugyot nga annual budget ni Mayor Rama.

* * *

Gamay na lang gyud ang kuwang, moabunda na ang tubig sa MCWD diri sa Lahug ug Mabolo area, ilabi na kami diri sa bukid.

Gisusi nako ang nagpadayon nga paglubong og mga dagkong tubo sa tubig sa Wilson Street sa Lahug, ug giingnan ko sa foreman nga tulo na lang ka tag-as ug dagkong tubo ang kuwang.

Human niana, i-tap na nila ngadto sa MCWD main line, ug isunod dayon ang pagbutang og mga Pressure Regulating Valve (PRV) aron nga mokontrolar sa bul-og sa tubig nga dili makaguba sa mga gripo.

Unta, ang bag-ong project engineer sa JFAP Construction mag-inabtik na unta, dili sama sa mi-resign nga project engineer nga wa na makaagwanta sa daghang palpak nila.

Kami sa Traffic Board nag-monitor gyud niini nga pipe-laying project sa JFAP kay nakahasol man gud kini sa dagan sa mga sakyanan.

Dali ra man gyud unta ni ba kon daghan pa sila og mga tawo nga motrabaho, unsaon, maihap lang sa tudlo ang ilang mga trabahador.