Kinakusgang panagang sa pamakak
Imbes kurhian ang iyang mga numero sa pagpasalig nga motubo ang ekonomiya sa Pilipinas og 7% karong tuiga human sila nagka-istorya ni Kristalina Georgieva, managing director sa International Monetary Fund (IMF), nga nangagpas nga motubo lang ta og 5%, si Presidente Ferdinand Marcos Jr. niinsistir sa iyang pataka:
• Niingon nga nakigpustaanay siyang Georgieva nga mas molig-on ang atong ekonomiya sa 2023 sukwahi sa pangagpas sa mga eksperto sa IMF; ug
• Nideklarar nga ang Pilipinas mao ang mangulo sa economic recovery di lang sa Asia-Pacific kon dili sa tibuok kalibotan.
** *
Bugtong katin-awan sa pagpabaga ni Marcos Jr. mao ang pagtuo nga nakatabang sa ilang pamilya sa pagbalik sa gahom 36 ka tuig human sila palayasa sa Edsa People Power Revolution niadtong 1986:
• Ang papating nga pagpanghimakak sa kinawat nilang katigayonan bisan kon napamatud-an na sa Korte Suprema sa tulo ka buwag nga mga kaso ug nakonbikto na si Imelda Marcos sa Sandiganbayan; ug
• Ang paugat nga kampanya pagpangilad nga paraiso ang Pilipinas ubos sa diktadura ni Ferdinand Marcos Sr. nga nakatabang nila sa eleksiyong presidensiyal sa Mayo sa niaging tuig.
* * *
Diin man gikan ang naghinobra nilang bilib sa gahom sa bakak? Di kinahanglan nga motan-aw ta sa layo. Ang mga opisyal sa US Army nga nibisto sa peke nga mga medalya ni Marcos Sr. sa ikaduhang gubat sa kalibotan maoy unang nipasidaan sa ka-epektibo sa iyang pangilad:
Si Marcos Sr. gihulagway nila nga dunay talagsaong talento sa pagpamakak uban ang matinud-anon nga dagway ug sa pagbalikbalik sa bakak atubangan sa sukwahi nga mga ebidensiya hangtod nga mohilom ang tanan nga nilalis.
* * *
Nahadlok ko nga igo lang gisunod ni Marcos Jr. ang iyang amahan. Maong way kukaikog ang iyang mga pamakak sa niaging kampanya sa eleksiyon, ngadto sa iyang inugurasyon ug unang State of the Nation Address (SONA) ug bisan sa World Economic Forum (WEF) sa Davos, Switzerland.
Kay di man ikapamugos ang kamatinud-anon ug maayong pamatasan ngadto sa mga nagtungkawo sa gahom, ang mahimo sa mabuot nga mga lungsoranon, nga di mosugot nga mabangkarota na sab ang nasudnong ekonomiya sama sa nahitabo ubos sa diktadura sa amahan, mao ang pagdumili pagkahilom sa pangilad sa anak.
* * *
- Latest
