Pagparesayin sa tanang PNP officers maot

Ang Philipinne National Police (PNP) tigpatuman sa balaod ug may otoridad paggamit sa ilang posas ug armas aron maproteksiyonan ang katawhan batok sa mga daotan ug nagkalainlaing matang sa kriminal.

Obligasiyon sa kapolisan ang pagsumpo sa gidiling drugas. Ilang responsibilidad ang walay hunong pagsikop sa mga malapason. Labi na, ang pagsubay sa linya oras ilang magunitan ang tumoy sa kutay sa illegal drugs syndicates hangtod matultolan ang tinubdan-punoan niini.

Apan makadismaya. Kay inay kapolisan maoy manakop, sila man diay ang mga dakponon (hinuon dili tanan). Ang makapakurat, kay hasta kinatas-an nilang mga opisyal midula sab.

Niadtong pagpamunoan ni Presidente Rodrigo Roa Duterte, iyang gihikyad sa publiko ang hitsura ug ngalan sa mga heneral, kinsa pulos nahilambigit sa illegal drugs syndicates sa nasud ug gibaharang pamatyon sa higayon iyang makit-an. Busa, nanglayas ug nanago.

Pero niining admnistrasiyon ni Presidente Bongbong Marcos (PBBM), diin si Benhur Abalos maoy iyang gipiling kalihim sa Department of Interior and Local Government (DILG), baliktad ang nahitabo.

Nagkaanam kadaghan ang heneral ug uban pang opisyal sa PNP ang gikatahong nahilambigit ning naasoyng kalihokang ilegal.

Apan imbes gukdon-pasakaag kaso hangtod mabilanggo, gidepensahan pa hinuon ni Abalos. Gitipigan ilang mga pangalan. Ug aron dili matumbok sa publiko kinsa kining mga tawhana, gimandoan niya tanang opisyal sa PNP pagsumiter og courtesy resignation aron kunohay malimpiyohan ang mabakanting puwesto ug maoy ipuli ang mga limpyo-tinuorayng tarong nga mga mangangalagad.

Dakong insulto kining gibuhat ni Abalos ngadto sa mga buotang opisyal, kinsa nadamay lang sa dili patas niyang desisyon. Nagpasabot ba kini nga 90% ang mga badlungon ug 10% ra ang tarong? Hinungdan, iyang giratsada tanan?

Sanglit katawhan ang nagsuweldo ug maoy boss sa tanang public servants, dapat ipahibalo ni Abalos sa publiko ang ngalan lamang sa mga hiwing opisyal ug dili iapil ang mga walay labot.

Unsaon man pagkahibalo-seguro sa nagmabinantayong katawhan nga ang ibalik sa puwesto wala sa mga pangalang black listed kon kini itago ni Abalos? Ikaduha, nganong courtesy resignation ra man ang isilot sa mga nakasalang opisyal imbes ibalhog sa bilanggoan? May exempted ba atong balaod?

Ay, pastilan, pagkaguwatsinanggo gyod nimo, Abalos. Ayaw intawon mig gitika, uy!