Driver sa taxi nga nag-birthday nanglibre sa iyang mga pasahero

Biyaan sa nato ang mga negativity mahitungod sa venue sa Sinulog diha sa South Road Properties kon SRP kay huwaton nalang nato ang sangpotanan niini karong adlawng Dominggo. Ari sa ta sa mga kasayoran nga makapagaan sa pagbati.

Sama nalang niining usa ka taxi driver nga nihatag og libreng sakay sa mga pasahero niya diin gikan sa sayo sa buntag hangtud na sa lawom nga gabii libre ang mga palarang pasahero nga iyang naagian.

Dili siya adunahan, gani nag-abang lang siya og taxi unit ug nangutang og kwarta nga ika pa full tank sa gasolina aron lang sa iyang free ride ngadto sa mga tawo.

Siya si Abraham Abdon Verdida, 56-anyos nga taga dakbayan ra usab sa Sugbo. Nganong iya man kining gihimo?

Ako siyang nahinabi ug gitug-an niya nga birthday niya kagahapon ug inay siya ang regalohan siya ang nanghatag og regalo isip panaad sa Señor Sto. Niño ug alang usab sa iyang adlawng natawhan.

Ikaupat na kini ka tuig nga iyang gihimo bahala og igoigo ra ang iyang kita basta makatuman lang sa iyang saad kay alang kaniya sagrado kini nga gikinahaglan tumanon nga bukas sa kabubot-on.

Ang mga tawo nga gaatang sa daplin sa karsada daw dili makatuo nga dunay taxi driver nga magpasakay kanila nga libre. Ang uban nagduhaduha sa pagsakay pero ang uban nangalipay ilabi kay nag ulan ulan.

Kong ang ubang taxi driver esnabero kong maglain ang panahon, si Abdon lahi sa uban kay pasakyon gyud ug libre pa gyud, talagsaon kaayo ang hiyas sa driver sa taxi, dili kini gimmick lang kay kaupat naman ka tuig niyang gihimo, ako na ni siyang na-feature sa TV last year ug iya kining gipadayon karon.

Ang sama ni Abdon nga igoigo lang ang kita nakapaambit sa uban, maayo usab kong ingon niini ang pagabuhaton sa mga adunahan. Bitaw wala man mag-apas og balos kay alang kaniya naghatag kini og katagbawan nga makatabang sa uban.

Abdon Verdida angayan lang nga daygon ug saludohan ka!