Sinulog sa SRP

Karong Domingo mao na ang adlaw sa Sinulog Festival 2023 sa dakbayan sa Sugbo. Human sa duha ka tuig nga pagkahunong niini gumikan sa Covid-19 ug bagyong Odette, mobalik na gayud kining maong religious ug cultural nga kalihokan.

Alegre na usab ang dakbayan sa Sugbo gumikan sa umaabot nga Fiesta Señor. Kini kay makapaabot kita nga manimalos gayud ang katawhan sa pagsaulog sa Sinulog human sa duha ka tuig nga pagkatanggong sa ilang mga panimalay tungod sa pandemiya.

Gani sa niaging semana pa nga naghuot ang atong kadalanan gumikan sa mga tawo nga sige nang panggawas sa ilang panimalay. Ug dili lamang ang mga molupyo ning siyudad ang excited na. Liboan usab ka mga bisita ang gitakdang modagsa sa dakbayan aron pagsaksi sa labing dako nga festival sa nasud.

Hinuon adunay dakong kausaban ang pagpahigayon sa Sinulog Festival karong Domingo. Kini gumikan kay, sa unang higayon, adto kini ipahigayon sa South Road Properties, gikan sa parade hangtud na sa final showdown sa mga contingent.

Nakadesider si Mayor Michael Rama nga adto sa SRP ipahigayon ang Sinulog karong tuiga aron usab ma-showcase ang maong premyadong luna nga mao unya ang mag-unang business district sa siyudad ug Metro Cebu.

Apan daghan ang dili pabor sa maong desisyon sa lokal nga kagamhanan. Tungod sa kalayo ug kamingaw sa SRP, basin kuno kon langawon unya ang Sinulog didto. Kini ilabina kon ulanon nga siguradong magkalapok gayud ang maong venue.

Daghan ang kontento nga sa naandang venue na lamang unta ipahigayon ang Sinulog Festival karong Domingo. Mas sigurado sila nga mas dumogon gayud kini tungod kay anaa man kining maong kalihokan sa sentro sa dakbayan.

Hinuon nakadesisyon na ang lokal nga kagamhanan sa siyudad. Ug angay lamang nato kini nga respetohan. Ato lamang hulaton ug tan-awon kon wala ba sila masayop. Kon palpak ang pagpahigayon sa Sinulog sa SRP, magpungasi gayud nga mga pagsaway ang ilang mapaabot. Apan kon dako kini nga kalamposan, nan walay rason nganong dili usab nato sila pasidunggan.