Kini'y pari maabot  sa mga tawo!

Nag-viral sa social media ang pari ug mga sakristan sa simbahan sa dakbayan sa Danao lalawigan sa Sugbo tungod sa "Ting Ting Tang Tang" TikTok dance craze human sa Misa de Gallo diin nakaani kini og mga managlahing reaksyon sa social media ug bisan gani sa katilingban nga naglibot sa simbahan.

Dunay naglagot kay lagi dili haum nga sa sulod sa simbahan ug atubangan pa gyud sa altar gihimo ni pader ang pagsayaw unya nakasutana pa gyud. Naa ganiy niingon nga gikinahanglan gyud nga silotan ang pari sa gihimong pagbastos sa simbahan tungod sa ilang pag-Tiktok

Kong dunay naglagot, daghan usab ang nahimuot ilabi na kadtong nakasabot sa katuyoan sa pari nga mao ang pagkabig sa mga tawo nga mohatag og bisan ginagmay nga kantidad nga magamit sa simbahan sa pagpatuman sa ilang proyekto lakip na gani ang comfort room nga kinahanglan na gyud ayum ayumon aron makaserbisyo pud sa mga manimbahay.

Pastilan sa dili pa nato hukman ang gihimo sa pari, luagan sa kuno nato ang atong pangisip ug tugkaron ang kamatuoran kay sa motira pasagad sa mga pagsaway ngadto sa gihimo sa pari ug iyang mga sakristan.

Para nako wala koy nakita nga dautan sa gihimo ni father kay kabahin man kadto sa ilang pagpanaygon human sa misa, gisal-ot nalang kadtong TikTok dance aron padugang sa lingaw ug hugyaw sa katawhan nga nalipay ug nihangop sa ilang gihimo.

Sa mga nanaway bi present ba mo niadtong tungora dihang nanaygon ang pari ug mga sakristan human sa misa? Kong wala aw  ayaw nalang pud palabi og panaway kay wala gani ka nakahatag og sinsilyo.

Dautan ba gyud diay ang meaning aning "Ting Ting Tang Tang" Tiktok dance nga mora’g gihalangan man gyud ang mga self-righteous nga kong maka-react grabe kaayo makahusgar? Ambot kong sakto ba ang akong pag-research sa meaning aning pulonga. Vietnamese  words  ang “Tinh Tinh” nga nagpasabot og “love,” samtang ang  “Tang Tang” means “love you.” Aw mahitungod diay kini sa gugma, nindot diay ang kahulogan niining kantaha nga gipaagi lang sa pagsayaw.

Nakadayeg ko sa gihimo ni father kay nagpakita lang siya sa iyang pagkatawhanon. Kong sa tinagalog pa  "totoong tao" ang pari nga maabot sa kamot sa mga tawo dili pareha sa uban diha nga unreachable star gihapon pwera gaba mora’g mga Padre Damaso ang kinaiya.

Kong ingon niini ang ipakita nga kinaiya sa mga pari gaan ug malipayon seguro ang pamati sa mga parokyano ug makabig gyud og samot ang pag-adto sa simbahan kay usa man ka higala ang ilang pagtan-aw sa alagad sa simbahan. Father padayon sa imong maayong buhat, ayaw padala anang mga self-righteous, feeling perfect and holy apan anaay mga tinagoang basura nga pwerting bahoa.