PBBM, Remulla gihapon ka?

Hugaw na kaayo ang papel ni Justice Secretary Crispin ‘Boying’ Remulla nga siya ra mismo ang nakapahugaw. Kini nagsugod human patya ang hard hitting radio commentator Percy Lapid sa nag-riding in tandem samtang nagdrayeb sa iyang itom Innova padulong sa ilang subdibisiyon.

Diin, human mosurender ang mamumuno, bisag wala pa masugdi ang patas-inisyal nga imbestigasiyon, gipasanginlan na ni Boying si Bucor Chief General Gerald Bantag nga mao kunoy mastermind. Iya dayon kiningg gisuspenso, gikuhaag armas, sakyanan ug mga sinaligang otoridad nga kauban sa heneral sa seryosong pagsumpo sa tanang daotang kalihokan sulod sa Bilibid.

Sa laktod, gihurot ni Boying pagkuha ang tanang guwardiyang gikahadlokan sa illegal drug syndicates ug maoy gipuli si Gen. Gregorio Catapang, notadong Dilawan, kinsa nahimong pinangga sa mga piniriso.

Tiaw bay, sa iya pa lang paglingkod, boluntariyo kunong gipangtahan sa inmates ang libolibong fresh canned beers ug nagkalainlaing kontrabandong gipangtay-an na? Pero palpak ang maong diskarte. Walay tarong og utok ang mituo.

Niining bag-o, si Bucor security official Senior Superintendent Ricardo Zulueta, kinsa gidamay-pasanginlan sab ni Boying nga maoy ikaduhang mastermind, kay mao kunoy nagsugo nga ipapatay si Cristito Villamor Palaña, ang gitudlong middleman ni Escorial, kinsa maoy gikasabot-kaistorya pinaagi sa selpon nga ipapatay si Percy, mipakita sa publiko pinaagi sa social media ug hugtanong namahayag nga tanang gipangyawit ni Boying batok niya ug ni Gen. Bantag, pulos bakak.

Presidente Bongbong Marcos (PBBM), hagbay rang nanawagan ang katawhan nga palagputon na sa serbisyo kining imong pinili nga wala nay ayo. Hain na bang imong saad nga ipadayon ang War on Drugs ni Tatay Digong kon kini mismo si Boying, matod pa ni Gen. Bantag misugo niya nga pabuhian ang mga drug lords sa Bilibid niadtong wala pa siya suspensoha?

Hasta inmates, kinsa nabilanggo tungod sa illegal drugs panahon ni Tatay Digong, mao pay gihimong mga testigos ni Boying aron pisakon si Gen. Bantag. Pro-illegal drugs na ba si Remulla?

PBBM, tungod ni Boying, naguba ang lig-ong tigbayon-pang-alkontra sa illegal drug syndicates, nakamansa sa ligdong imahe sa Department of Justice ug nakapahuyang sa imong pagpamunoan. Unya, Remulla gihapon ka?

PBBM, intawon hinuktoki kinig maayo samtang dili pa ulahi ang tanan.