EDITORYAL-Ang sunog malikayan

Miabot og P500 milyones ang danyos sa nahitabong mga sunog sa Cebu City gikan sa bulan sa Enero hangtud ning buwana sa Disyembre ning tuiga sumala pa sa kabomberohan.

Wala pa gani mahuman ang bulan sa Disyembre ug duna pay umaabot nga mg kalihokan sa Pasko ug Bag-ong Tuig nga duna say peligro sa sunog tungod sa pabuto o electrical misuse.

Ang maong balita kapunitan unta og leksyon sa katawhan tungod kay dako kaayo nga kawad-on sa banay ang masunogan.

Dunay panultihon nga mas maayo pang mabahaan kay duna pay mapunit apan kun sunog nag ani, lisod na kaayo.

Karong taliabot na ang Kapaskohan, kinahanglang magbantay ang katawhan sa paggamit sa kuryente ilabi na sa ilang mga gipang-adorno pang Pasko nga gamitan og kuryente.

Ang Department of Trade and Industry naghimo na og monitoring sa mga baligyang dayan-dayan sa Pasko ilabi na ang mga Christmas lights.

Sagad man gud sa mga sunog kaniadto mga substandard nga mga Christmas lights maoy gibasol sa hinungdan sa mga sunog samtang nagpadung ang Pasko.

Posibleng mao sab kini ang rason karon nga menus na kaayo dili sama kaniadto kadaghan ang mga balay nga namutang aning mga Christmas lights. Nahadlok sila nga substandard ang ilang mapalit.

Kay angkunon man o dili sa DTI , dili gyud tanang mga gipamaligya diha sa mga tindahan nainspeksyon nila ug duna gyuy mga ICC seals.

Tungod kay kining ubang mga dili pasado sa standard possible man gihapong ipalusot sa mga hakog nga mga magpapatigayon,

Gawas pa sa electrical misuse naa pay ubang mga sunog nga ang hinungdan mao kining mga nigamit og dili luwas nga mga butane canisters.

Ang unta single-use nga lata, gi-refill sab sa mga illegal nga refillers, mao nga subsob sab karon pagbantay sa mga otoridad ilabi na sa Department of Energy.

Kaning sunog malikayan lamang kun ang tanang tagbalay responsible sa paggamit sa kalayo o sa kuryente. Kun ang nanimuyo iresposable ug patara lang, kanunay nilang gibutang sa peligro ilang kinabuhi.