Gilumloman og kapin lima ka buwan
Sa kataposan, niabot na ang akong National ID gahapon sa hapon. Human sa pila ka buwan nakong tagawtaw sa akong mga programa sa YouTube ug Facebook. Ug human sa mas daghan buwan sa pagpaabot sukad mi nagpa-biometrics sa SM City-Consolacion sa niaging tuig.
Ang suwat sa Philippine Statistics Authority (PSA) nga gipapitlan sa ID gipetsahan og Mayo 6, 2022. Hanap ang post mark luyo sa sobre nga gisudlan sa suwat pero dihang gigamitan og magnifying glass nasihag ang June 7, 2022. Sa atubangan sa sobre dunay suwat sa bolpen nga 6-8-22.
* * *
Dihang una kong nituki sa kalangay sa minilyon ka National IDs, apil nang ako, pila ka buwan ang nilabay, may ni-comment sa chat box sa YouTube nga hagbay rang niabot ang akong ID sa Consolacion Post Office. Pero naproblema ang kartero kay katulo na siya nagbalikbalik pero kanunay lang nga way tawo sa among balay.
Naglisod ko og tuo sa mensahe kay sukad sa pandemya wa mi gawas-gawas sa akong asawa gikan sa among pinuy-anan. Tagsa rang imbitasyon sa gawas nga among gidawat tungod sa among kahadlok sa tinakdanay.
* * *
Maong niadto dayon ko sa post office sa Consolacion usa ka adlaw human nako nabasahi ang mensahe. Taas ang linya nga akong naabtan. Pulos sab nangita sa ilang National IDs. Mosumpay unta ko sa linya pero giingnan ko sa usa ka kawani nga wa pa moabot ang akong ID.
Nipauli ko ug nagpadayon sa paghuwat. Nangutana sa naghatag sa mensahe kon trabahante ba siya sa post office. Pero wa na siya motubag.
* * *
Niaging semana, nagpadala ko og sinuwat nga mensahe sa post office pagsusi sa akong ID. Giingnan sa mga kawani ang akong gipalihug nga wa sila kahibawo kon duna ba koy mga suwat. Bugtong nahibawo mao ra ang kartero.
Nakahukom kong moinat sa akong paghuwat. Ambot kon ako pa bang susihon nganong natanggong ang akong National ID og tunga sa tuig sa post office nga pila ra ka eskina gikan sa among pinuy-anan. Hinaot nga sayop lang nga balay ang gituktok sa kartero. Ug di tinuyo ang kalangay aron pagpadala nako og mensahe nga di nila mapadangat sa mas direktang paagi.
* * *
- Latest
