Hunong na ta aning BRT

Komusta na ba ang Bus Rapid Transit nga subra sa 20 ka tuig na nga naunsiyami nga maimplementar sa dakbayan sa Sugbo? Unsa nay kahimtang niining maong labing dako nga proyekto sa mass transportation sa Kabisayaan?

Ang ulahing balita niini mao nga gusto sa World Bank nga iuswag ngadto sa 2025 ang implementasyon sa BRT sa dakbayan. Buot ipasabot nga dugay pang panahon ang atong paaboton una pa kita makapahimulos niini.

Ang maong proyekto gisuportahan sa World Bank kauban sa Agence Francaise De Developpement (AFD) nga maoy mohatag og loan ngadto sa kagamhanan sa dakbayan sa Sugbo.

Walay rason gikan sa WB ngano nga iuswag ang pagpatuman sa BRT. Mismong si Mayor Michael Rama ang walay reaksiyon usab niining maong kalamboan. Hinuon daan na kining mipahayag nga iya g’yung i-fight nga maimplementar ang BRT sa siyudad.

Hinuon, hagbay ra nga gi-fight sa dakbayan ang BRT. Gikan sa administrasyon ni Tomas Osmeña, ni Edgardo Labella ug karon ni Rama, pulos sila agresibo nga mapatuman gayud ang maong proyekto.

Apan unsa ba gayud ka importante ang implementasyon sa BRT sa dakbayan sa Sugbo? Makapalambo ba gayud kini sa nagkaguliyang nga sistema sa transportasyon niining siyudad?

Basin hinuon nga magdugang lamang kining BRT sa nagkagrabeng problema sa trapiko sa siyudad, ilabina nga pulos na hagip-ot ang atong mga karsada ug nga nagkadaghan na ang mga sakyanan sa kadalanan.

Ang problema sa BRT project mao nga ang Osmeña Boulevard lamang ang gikuhaan og desinyo alang niini kay lagi mas dako ug luag. Apan dili ba dakong problema kon moagi na ang mga dagkong bus sa Escario Street ug sa dalan paingon sa Talamban tungod sa kahagip-ot niining maong mga karsada?           

Hinuon mahimong padak-an usab kining maong mga karsada. Apan sa kadaghan ug kadagko sa mga establisemento nga naglumbay kilid niini, dakong hasol sa siyudad ang pag-secure sa road right of way. Kini ilabina kon magdumili ang mga negosyante sa tanyag sa kagamhanan nga mosangpot na hinuon sa kumbati sa korte. Alang kanako, mas haom ang BRT kon gipatuman pa kini sa dakbayan kaniadtong dekada 90 sa panahon nga mas gamay pa ang gasto pag-secure sa road right of way ug road widening ug nga gamay pa ang mga private vehicles nga nagdagan sa kadalanan.       

Apan karon, daghan ang nagtan-aw nga dili na gayud epektibo ang pagpatuman sa BRT dinhi sa siyudad sa Sugbo. Kay posible nga magdugang lamang hinuon kini sa nagkagrabe nang problema sa trapiko

Kon gusto gayud ang lokal nga kagamhanan og moderno ug mas komportable nga transportation system, mas angay ang light rail transit, skyway ug tunnel nga ipatuman sa dakbayan karong panahona. Kini kon gusto gayud kita og world class nga infrastructure system.