CCMC humanon pinaagi sa donasyon

Gipahibawo ni Mayor Michael Rama nga dili na ipadayon sa dakbayan ang kontrata niini sa kasamtangang kontraktor sa Cebu City Medical Center.

Ang pahibawo gihimo sa mayor kagahapon pipila ka adlaw human sa iyang adlaw'ng natawhan nga maoy pasalig sa kontraktor nga mahuman ang tambalanan.

Unang nihangyo ang kontraktor nga hatagan sila og higayon paghuman sa proyekto hangtud sa Pebrero atol sa Charter Day sa syudad sa Sugbo.

Apan nausab ang huna-huna sa mayor ug mihukom pagkanselar sa tanang kontrata sa M.E. Sicat tungod sa giingong kalangan sa trabaho.

Wala pay klaro bayaran ba sa kagamhanan ang balanse sa trabaho nga nahuman sa kontraktor.

Sigun sa plano, napulo ka andana ang bag-ong CCMC  apan upat pa lang ka andana ang nahuman sa kontraktor.

Human niya kanselaha ang kontrata, plano sa mayor nga dili na ihinayon ang 10 ka andana.

Sigun sa taho buot sa mayor nga kutob nalang sa pito ka andana apan ang nahabiling tulo ka andana dili na mogasto ang syudad.

Plano ni Rama nga ipahuman ang CCMC pinaagi sa mga donasyon. Matud niya nga duna nay mga mipasalig nga motabang aron mahuman ang tambalanan.

Sayo niini gipahibawo ni Rama nga misaad ang tycoon nga si Manny Pangilinan nga motabang og gasto. Nisaad sab ang Consunji group nga modonar.

Kun unsay bugti sa maong mga donasyon si Rama ray nasayod. Apan kun makadaginot ang syudad sa gasto niining maong paagi mas labing maayo.

Hinaot lang nga ang kwartang atong madaginot gamiton sa hustong paagi og dili mawaldas kay makauuwaw sa mga donors nga kita nagpakilimos unya ang atong kwarta giusik-usikan.

Hinaut dili na mausab nga sayon-sayonon lang pagpanghatag ang P50 milyones isip hinabang sa mga biktima sa katalagman sa laing dapit samtang kita nagpakiluoy aron mahuman ang atong tambalanan.