Krimen dahil sa POGOs
Naubos na ang pasensiya ni Justice secretary Jesus Crispin Remulla sa mga nangyaring pagpatay at pagkidnap sa mga dayuhan na ang pinagmumulan nito ay ang malawak na operasyon ng Philippine Offshore Gaming Operators (POGOs). Noong nakaraang linggo maraming Chinese ang na-rescue ng PNP sa isinagawang pagsalakay sa Parañaque City.
Sampung Chinese national ang naaresto at pinaniniwalaang kasapakat ng sindikato. Kaya naman lalong naipursige ni Remulla na ipadeport na ang mga dayuhan na walang mga dokumento na nagtatrabaho sa POGO matapos makausap ang ambassador ng China.
Ayon kay Remulla, 40,000 illegal Chinese ang nasa bansa na ang karamihan ay mga walang working permits. Nasisira ang image ng Pilipinas matapos gawing battle ground ng sindikato ang mga lugar na pinagtayuan ng POGO. Ipinag-utos ni Remulla sa Philippine National Police (PNP) at National Bureau of Investigation (NBI) ang paghanap sa mga Chinese ne-recruit ng sindikato upang ibalik sa kanilang bansa.
Noong una marami sa mga opisyales ng pamahalaan ang natuwa sa POGOs dahil makaaambag ito ng pera sa kaban ng bayan. Subalit nang tumagal na ito sa operasyon, nabisto na kakarampot lamang pala ang naipapasok na kita nito sa bansa. Matindi rin ang dinulot nito sa bansa dahil sa halip na magagamit sa pagbibigay ng siguridad ang kapulisan ay naitutok tuloy sa pag-rescue at paglutas sa malawakang kinapping at patayan ng mga sindikato.
Kaya malamang sa darating na mga araw tiyak na maipapatapon pabalik na ang mga Chinese na walang mga kaukulang dokumento. Mababawasan na ang human trafficking at kidnapping sa bansa. At para naman sa mga may legal na permiso mula sa PAGCOR tiyak na mabibiyayaan ng trabaho ang mga Pinoy na makapagtrabaho sa POGO.
- Latest
