Disiplina alang sa kalamboan

Sa tinguha nga makab-ot ang Singapore-like Cebu City gihimo karon ni Mayor Mike Rama ang tanan niyang mabuhat aron mahitabo kini sulod sa hamubo nga panahon apan daghan ang nisaka ang kilay ug nagduda kong matinuod kini. Ngano man nga dili? in fairness duna nay mga gipatuman nga kausaban karon sa dakbayan.

Dili kini mahatagan og katumanan kong ang mga tawo magpabiling magmagahi ang ulo nga kanunay mosumpaki sa mga ipatuman nga patakaran sa dakyanan. Subo palandungon nga adunay kanunay lang manaway apan mao usab ang kanunay magpabadlong.

Aron maseguro nga gidamgong mahisama sa Singapore gikinahanglan nga usbon usab ang pamatasan sa mga tawo nga pareha ka disiplinado sa mga nagpuyo sa Singapore. Busa sugdan na sa paghingusog ang pagpitol sa mga badlongon aron mosunod sa balaod.

Sugod sa unang adlaw sa Oktobre, ipatuman ang Oplan Disiplina nga gikatakdang ipagawas ni Mayor Rama diin estriktong ipasunod ang tanang mga ordinasa sa dakbayan ug kadtong mga malapason dunay padulngan.

Para nako dili naman unta gikinahanglan nga ipaagi sa executive order ang pagdisiplina sa matag usa kanato kong kada tawo mismo ang modisiplina sa kaugalingon. Bati paminawon nga napugos sa pagtuman sa lagda kay mahadlok masilotan.

Sagad mahitabo ang pagpataka og labay sa mga basura, sama diri sa agianan padulong sa estasyonan sa GMA sa Barangay Apas nindot unta kaayo ang palibot kay green kaayo ang mga kahoy ug uban pang mga tanom. Apan sa karsada mismo nagpasad ang mga basura ug nangalisbo ang baho.

Asa ka og karsada labayan og basura? Ang taga barangay intawon ang matagbaw sa paghipos, kong naghunahuna lang unta ang mga tawo sa dautang epekto sa pagpataka og labay sa basura dili na unta kini mahitabo, dili makahulat ang mga tawo sa koleksiyon sa basura tungod kay naa silay mga sakyanan ihulog lang sa karsada.

Apil ang ang illegal parking nga hangtud karon naghitak gihapon ilabi na sa panahon sa kagabhion. Hinuon nasampolan niadtong nakalabay’ng adlaw ang sakyanan ni Konsehal Jaypee Labella nga gi-clamp human nalimot siya pagpasulod sa ilang garahe ang iyang pick up. Mapaubsanon siyang niangkon sa iyang sayop ug nidayeg sa enforcer nga mi-clamped sa sakyanan, maayo unta ingon niini ang mga enforcer nga dili magpanagana baha og si kinsa basta sa makasala pahamtangan gyud og silot.

Ang kaluag nato sa pagtuman sa mga lagda bisan og nasayod na kita nga bawal kini apan dili gyud magpakabana, kong magpabilin kining maong kinaiyaha dugay nato makab-ot ang pag uswag nato mismo sa atong kinabuhi ug mao usab ang gamiton nato nga kinaiya sa atong katilingban.

Dili mahimo sa mayor kong mag inusara siya sa iyang tinguha apan dali nga makab-ot ang kalamposan kong suportahan sa tanan, kadtong mga nagduda hatagan pud ninyo og higayon ang tawo nga makapamatood niini kay magsegi lang og panaway apan wala usay natampo nga kaayohan.