Inantigong buhat maayong balita

Septiyembre 18, 2022: Ikakawhaag-lima nga Domingo sulod sa tuig

Mga Pagbasa: Am. 8;4-7/Sal. 113/1 Tim. 2;1-8/Lk. 16;1-13

Nabutang sa kakuyaw ang kaugmaon sa piniyalan. Human masayri nga wa niya tarunga og pagdumala ang katigayonan ug kabtangan sa iyang agalon siya gibaharan niini nga papahawaon. Busa gihimo dayon niya ang inantigong lakang aron siya mamahimong seguro gihapon sa iyang ugma bisan pa man kun sa kadugayan siya papahawaon gikan sa iyang kasamtangang buhat.

A.  Ang Utang KPabubot-on

Gipatawag dayon niya ang tanan nga nagpakautang sa iyang agalon. Ang tanang mga utangan iyang gipaningil apan sa mas ubos nga presyo. Hinuon dili siya alakanse niini tungod kay ang iyang gibuhian ingon nga kaltas sa orihinal nga presyo mao man ang iyang komisyon. Ang mga tawo nga nakasinati sa maong kamanggihatagon ang molantaw niini ingon nga utang kabubut-on. Ang utang kabubut-on kinahanglang mabayran og kaayo sa umaabot nga panahon.

B.  Ang Dungog

Alang sa mga Judio ang dungog bahandi. Sa dihang gihimo sa maong maro nga piniyalan ang pagkaltas sa presyo nahimong mas nabaniog ang iyang agalon ingon nga manggihatagong tawo. may paghunahuna sa mga nagpakautang kaniya. Kining maong pamaagi nakapabulahan dili lang sa piniyalan kondili hasta usab ang agalon. Mao kini hinungdan kun nganong nakadayeg ang agalon sa maong tikasan nga piniyalan. Maantigo kining mangita og paagi aron lamang mabuhi ug magpakabuhi.

Kasinatian

1. Ang pagkaulipon sa bahanding kalibutanon lakip na niini ang salapi mao usahay makapahimo sa tawo nga mamintaha sa uban. tungod sa kahakog anaa ang pagbansay sa dili makiangayong tubo kun interes sa bisan unsa. Tungod sa naghinobrang pagpangga sa salapi ug bahandi usahay wala nato makita  nga dunay tawo o mga tawo nga nagkinahanglan. Ang nahitabo mao nga atong gigamit ang tawo apan gihigugma nato ang kwarta. Nahimong ang salapi maoy nidumala sa atong kinabuhi.

2. Ang uban kanato nahimong sama sa agalon ning maong ebanghelyo. Nakadayeg sa inantigong buhat sa maong piniyalan. Usahay atong piyongon ang atong mga mata tungod kay kita mismo nabulahan  man sab. Anaa ang pagginamitay dili ang pag-inalagaray. Ang mahinungdanon ning kapanahonan karon mao nga anaa ang benepisyo bisan pa man kun kini dili makiangayon.

3.  Mahinungdanon ang pagsalig. Kun dili kita kasaligan sa mga ginagmay nga mga butang unsa na kaha sa mga dinagko?

Lihok

1. Karong semanaha ug sa tanang adlaw sa atong kinabuhi atong tarongon ang matag transaksiyon nga atong pagahimoon. Ginagmay man o dinagko. Honesty is the best policy.

2. Higumaa ang tawo gamita ang kwarta dili kay higugmaon ang kwarta apan gamiton ra ang tawo.

3.  Ang pagkamnggihatagon maoy makapadasig kanato sa paghunahuna sa uban ug dili lang sa atong kaugalngon.

Pangamuyo /pagsaulog

Masalaypon kami Ginoo kay gitan-aw man namo ang among kaugalingon. Nahikalimot kami nga dunay uban nga nagkinahanglan. Nahimo kami limbongan bisan gani sa among kaugalingon. Busa kaloy-I ug pasayloa kami. Hinaut unta nga mamahimo kaming matinud-anon kanimo Ginoo.

Naisip mo ba kun kalag mo mawala. Bisan ang kalibutan maimo. Kay tingali baya halayo na ikaw! Igsuon pamalandong karon….

Sa makadaghan giusikan namo ang imong mga hatag. Dili matinud-anon ang among pagtuman sa among trabaho. Ning maong paagiha Ginoo among gibalewala ang imong kaayo. Unta mamahimo kaming magbinuotan sa among trabaho.

Naisip mo ba kun kalag mo mawala. Bisan ang kalibotan maimo. Kay tingali baya halayo na ikaw! Igsuon pamalandong karon.