Mga babaye sa kinabuhi ni Jesus
Pinasikad sa Lukas 8;1-3
Sa kapanahonan sa atong Ginoo ang mga babaye walay igong tingog. Ang pagkawalay tingog maoy nakapahimo nilang dili kaayo ilado ug gani dili kaayo mahinungdanon.
Apan lahi ang atong Ginoong Jesus. Daghan ang niduol kaniya nga babaye.
Bisan pa man kun maisip natong usa siya ka Judio padayon niyang gihatagan og bili ang mga babaye. Gitugotan niya sila nga makaambit ug manginlabot sa iyang misyon ug kalihukan. Ning paagiha nahimong daw nahatagan og igong kadasig ang maong mga babaye nga manginlabot ug motabang.
Ang implikasyon niini mao nga ang simbahan dili lang alang sa mga lalaki. Ang simbahan alang gyud sa tanan.
Ang simbahan dili lang alang sa mga kusgan. Ang simbahan alang pud sa mga mahuyang. Gipili sa Dios ang mga mahuyang ug iya silang gilig-on.
Hatagan ang mga kababayen-an og kahigayonan nga makapapadayag sa ilang kaugalingon makapakita sa ilang presensiya sa katilingban ug makahatag sa ilang tampo alang sa kalamboan sa kinabag-an.
Walay mga butang nga dili mahimo sa bababye nga naandang nahimo sa usa ka lalaki.
Ning paagiha nahimong mas malangkubon ang tanan alang kanato.
Unta ning paagiha mas makita nato ang atong kaugalingon nga susama sa mga babaye kang kansang kinaiya maampingon ug maamomahon. Mabuhi ang mga babaye!
- Latest
