Magtinabangay

Hilabihan ka dako sa kantidad nga gikinahanglan aron nga masulbad ang problema sa lunop ug baha dinhi sa Cebu City ug sa silingan nga mga siyudad ug lungsod.

Kinahanglan nga dunganon sa pagsulbad ang problema sa paglunop ug pagbaha sa ubang dapit sa Metro Cebu, kay kon dinhi lang sa Cebu City ang sulbaron, dili gihapon maayo.

Apan kinahanglan nga ang mga mayor sa tanang siyudad ug kalungsuran sa Metro Cebu magtinabangay gyud, dili kay maghinan-aw lang.

Wa tingali malilong kaninyo nga kon adunay kusog kaayong uwan, ang lunop ug baha masinati gyud sa lainlaing dapit sa Cebu City, Mandaue City, Talisay ug sa Minglanilla.

Tungod kini kay malagmit nga ang agianan sa tubig paingon unta sa dagat, mabaw na kaayo, ilabi na nga gagmay na ang kasapaan.

Kon maglunop sa Mandaue City, apektado ang dagan sa mga sakyanan ug makamugna kini og traffic nga moabot sa Consolacion ug dinhi sa Cebu City.

Nganong maglunop man diha sa Barangay Tipolo ug sa Barangay Subangdaku, Mandaue City? Tungod kini kay sa pag-reclaim sa dagat nga karon nahimo na nga North Reclamation Project sa Mandaue.

Pagka karon, si Cebu City Mayor Michael Rama bisan unsa na lang ang gihimo aron masulbad ang mga problema ug iyang mapalambo ang siyudad sa Sugbo ug mahimong mora’g Singapore.

Karong adlawa, molarga si Mayor Rama paingon sa Manila aron nga makigtagbo ni Presidente Marcos ug sa ubang adunahang magpapatigayon.

Kaniadtong miaging buwan, pag-adto ni Mayor Rama sa Manila, gipakigtagboan niya si business tycoon Manny Pangilinan ug gisaaran siya nga motabang kini paggasto pagpatukod og dugang andana sa Cebu City Medical Center.

Bahin sa lunop ug baha, ang national government pinaagi sa Department of Public Works and Highways (DPWH) dako kaayo’g ikatabang niini kay daghan sila’g pundo nga magamit.

Ang atong kasapaan dinhi sa Cebu City, hilabihan na ka mabaw, nga bisan hinay ra ang uwan moawas na ang tubig paingon sa karsada.

Unta, kon adunay dredging, kun pagpalawom sa kasapaan, seryoso unta ang atong mga opisyal sa kagamhanan, ilabi na ang mga tinugyanan sa Department of Engineering and Public Works.

Kaniadto gud, nakabantay gyud ko nga gitinontohan lang ang budget sa siyudad pinaagi sa paghimo og dredging nga diha magsugod sa sapa sa Colon ug uban pang lugar, nga angay unta adto sila magsugod sa bukana dapit sa dagat.

Angay’ng unahon pagpalawom ang mga “major waterways.” Bisan og habwaan pa sa lapok ang mga kanal, unya ang sapa mabaw, wa gyuy mahimo pagsulbad sa lunop ug baha.