Tiyabaw sa mga healthcare workers

Sumala sa gimbut-an sa Republic Act 11712 o ang mas naila nga “Public Health Emergency Benefits and Allowances for Health Workers Act,” obligado ang kagamhanan nga ipadayon ang paghatag og One Covid-19 Allowance (OCA) ang tanang healthcare workers sa nasud apil na ang ubang nalambigit sa pagpakigbatok sa pandemya.

Ang Department of Health (DOH) maoy gitahasan pagsiguro nga matiman ug mahatag ngadto sa mga healthcare workers ang maong benepisyo.

Apan daghan sa mga HCWs ang mipiya-it tungod sa kalangan sa paghatag sa maong allowance.

Dinhi sa dakbayan sa Sugbo nitiyabaw ang mga nurse, labi pa gyud ang mga job order nga kawani sa Cebu City Health Department, tungod kay hangtud ron wala pa silang kadawat sa maong allowance.

Way usa nilang nangahas pagreklamo tungod sa kahadlok nga maapektuhan ang ilang trabaho.

Apan sa hilom nagbagulbol tungod sa kalisod sa ilang kahimtang.

Wa say ganahan mopasabot sa mga opisyal sa CHD unsay hinungdan sa kalangan sa OCA sa mga HCWs.

Apan ang acting secretary sa DOH nga si Dr. Maria Rosario Vergeire miingon nga ila nang gipaspasan ang proseso.

Mipadala na kuno siya og team didto sa Department of Budget and Management (DBM) aron ilang maplantsa ang mga kakulian nga nakalangay sa pag-release sa pundo.

Gipasalig ni Vergeire nga sa dili madugay madawat na sa mga HCWs ang ilang OCA.

Susamang pasalig ang giluwatan sa DBM ubos sa kondisyon nga kumpleto ang tanang dokumento nga gisubmitir sa DOH. Dugay na ko kadungog sa maong pasalig apan hangtud ron pabiling nangandoy ang mga HCWs nga unta moabot na ang ilang gipaabot nga allowance.

Ambot nganong lisud alang sa DOH nga hatagan og prioridad ang panginahanglan sa mga HCWs.

Angayang unahon sa mga opisyal ang panginahanglan sa mga HCWs tungod kay sila maoy bayani niining panahon sa pandemya.

Labihan ka lampingasan alang sa mga opisyal sa DOH nga himoong daw sama sa mga makililimos ang mga HCWs sa ilang kaugalingong kwarta.