Ipadaplin ang kaluoy aron ang mga tawo dili mahimong makaluluoy

Luoy man kong mawad-an og pinuy-anan apan mas makaluluoy kong mawad-an og kinabuhi ang mga tawo nga anaa nagpuyo sa daplin sa kasapaan nga namilegro kong makasinati og pagbaha. Ilabi na karong panahona nga kanunay ang pagbundak sa ulan nga maoy hinungdan sa grabeng pagbaha, gani usa ka balay sa Barangay Mambaling ang gianod sa baha niadtong niaging semana sa Kinalumsan River diin naay usa ka tawo ang naapil maayo nalang kay naluwas.

Ang nahitabo posibleng masubli pa ug mas deadly kong dili dayon maaksyonan sa kagamhanan busa gipatuman dayon ang clearing operation sa daplin sa kasapaan. Dugay na silang gipamayran aron makapangita og laing kapuy-an apan ang uban nagpabilin pa man. Mintras dili pa ulahi ang tanan gipatuman na sa dakbayan ang paghawan sa mga nanimuyo sa daplin sa mga sapa diin giuna ang naa sa kilid sa Kinalumsan river, sa pag-adto nako sa dapit nahawan na ug makita ang ka peligro sa dapit.

Tunga ra sa dupa ang yuta nga nahimo pang gitukoran og mga balay kaniadto sa mga tawo nga gamay’ng sipyat lang segurado gyud ang disgrasya, gani duna koy naestorya didto nga namatyan sa iyang inahan kaniadto human mahulog sa sapa wala pa gani ang baha.

Admitido ang mga molupyo nga kong duna silay kapilian nganong mopuyo man sila sa dapit nga peligro ug dili gani haum alang sa mga tawo apan wala man kuno silay kwarta nga ikaabang og mga kapuy-an.

Dili seguro himoong rason ang kalisod nga isugal nalang sa peligro ang kinabuhi nila. Mao ganing nianhi sila sa dakbayan kay manginabuhi apan kong madisgrasya kamatayon ang ilang maangkon.

In fairness sa city government aduna na silay gihatag nga bayad alang sa mga apektadong molupyo apan nadawat na nila nagpabilin pa gihapon, 90% sa mga residente ang nidawat sa kwarta, ang kadtong wala modawat sa bayad mao usab kadto ang makaangkon og relocation.

Adunay mga programa ang syudad alang sa mga deserving beneficiaries nga makaangkon sa Medium Rise Buildings or MRB diin ihatag kanila isip permanenteng kapoy-an.

Sa panahon karon gikinahanglan gyud nga ipatigbabaw sa gobiyerno katig-a sa pagbati aron mapatuman ang clearing operation kay kong madala sa pagpaluoyluoy sa mga tawo, mas makamugna pa kini og dakong problema.

Nasugdan naman kini sa kagamhanan karon, angayan nga tiwason kini ug seguradohon nga dili na makabalik sa mga dapit nga peligro ang naasoyng mga tawo kay simbako og madisgrasya sila ang guberno ra ba gyud dayon ang basolon.

Sa mga tawo nga nagpuyo sa daplin sa mga sapa ayaw nalang pud huwata nga ipapahawa sa gobiyerno, kamo na mismo ang mohikling tungod ug alang sa kaluwasan sa inyong kinabuhi ug sa kinabuhi sa inyong pamilya.