EDITORYAL - Kampanya vs drugas, komusta?

Dili kinahanglang moabot sa punto nga patyon o mopatay ang kapolisan sa pagpadayon sa kampanya kontra ilegal nga drugas sumala pa sa bag-ong natudlong PNP Chief nga si Police General Rodulfo Azurin Jr.

Matud pa sa heneral dili solusyon ang pagpatay sa mga nalambigit sa ilegal nga drugas kondili ang pagpangita sa hinungdan kun nganong nagumon sa maong bisyo ang uban. Si kanhi Senate President Vicente “Tito” Sotto III ug si kanhi Senador Panfilo Lacson susama sab og giingon niadtong panahon sa kampanya sa bag-ohay lang nahuman nga national elections, nga dili kinahanglan ang dugoong war on drugs.

Si Azurin ug ang duha ka senador parehong gustong pangitaon ang hinungdan ug gikan didto sulbaron kini aron mahunong. Si Azurin nagkinahanglan og kooperasyon sa katawhan ilabi na sa mga opisyales sa barangay.

Kahinumdoman nga sa nakalabay nga administrasyon gilusad ang nagkalain-laing kampanya kontra ilegal nga drugas. Nahimong mabinantayon ang publiko ug ang lokal nga mga opisyales sa barangay batok niadtong ilang mga konstituwenteng nalambigit sa illegal drug  trade.

Apan nakakawhat kini sa atensyon ug pagkondenar sa international community tungod sa alegasyon nga extrajudicial killings sa mga drug suspects.

Kaliboang mga drug suspects, kadaghanan mga kabus nga drug pushers ang nangamatay atol sa kampanya tungod kay “nanlaban” samtang gawasnon ug padayon sa ilegal drug trade ang mga bigtime drug pushers.

Si Senador Ronald “Bato” Dela Rosa, kinsa kanhi PNP Chief ug maoy nagsugod sa Oplan Tokhang ug Oplan Double Barrel sa wala pa siya moretiro sa sayong bahin sa termino ni kanhi presidente Rodrigo Duterte mipasidaan nga peligro kaayo para sa Pilipinas kun mobalik og gara ang mga sindikato sa ilegal nga drugas.

Usa sa iyang gikabalak-an ang pagbalik unya sa serbisyo sa mga Ninja cops nga gipanangtang sa panahon ni Duterte. Ang Ninja cops mao ang mga hiwing mga polis nga nalambigit sa illegal drug trade.

Tingali samtang tuod makapaabot nga momenus ang mga insidente sa pagkamatay sa mga drug pushers sa anti-illegal drugs operations, dili unta kini tungod kay nawad-an og gana ang kapolisan sa kampanya.

Magpadayon unta gihapon sila, ingon man ang barangay officials ug ang komunidad sa ilang determinasyon susama sa ilang labok sa panahon ni Duterte aron hingpit mabuntog kini nga problema.