EDITORYAL - Motagam ang turista

Husto ang gihimo ni Bohol Gob. Erico Aristotle Aumentado nga mimando og imbestigasyon sa matud pa grabeng pagpaburot sa presyo sa pagkaon sa pipila ka mga negosyante diha sa Virgin Island sa Panglao sa ilang probinsya.

Husto kini tungod kay dili kini makaayo para sa lokal nilang turismo. Ang Virgin Island ubos sa protected landscape apan gitugotan kini nga himuong eco-tourism spot tungod sa maanindot niining dagat ug talan-awon. Pinaagi niini daghan sa mga lokal nga residente ang nakakita og panginabuhian. Apan ang problema, miabusar man sab ang uban pinaagi sa pagsingil og mahal nga bayad sa serbisyo ug produktong ilang gidalit ngadto sa mga bisita.

Sa kaso sa Virgin Island, ang mireklamo mi-post sa social media sa kadako sa ilang nabayran sa pagkaon (P26 mil) sa usa lamang ka kaonan. Presyo sa pagkaon gipaburot og maayo. Kun ingon niini kahakog ang mga lokal nga vendors maabog palayo ang mga turista.

Ang lokal nga turismo pag-promote kini sa lugar ug lokal nga produkto. Nagpasabot nga diha ra sa palibot makita o makuha ang ilang sagad ibaligya kay mao man kanay gidayo sa mga tawo.

Apan kun ingon niana taga-liog ang presyo sa ilang baligya, insultohon pa ang turista kay “dili ka-afford” kinsa pamay ganahang mobalik anang lugara?

Motagam gyud ug mao pay mokampanya batok sa maong lugar. Kinsa may mawad-an, dili ba ang lokal nga nagsalit sa ilang turismo? 

Sa panahon karon nga nihit kaayo ang mga langyaw nga turista tungod bag-ohay pang mikusokuso ang pandemiya, ug daghang nangagusbat sa bagyong Odette dinhi sa Central Visayas, maayo nalang kung dunay mga turistang masalaag aning mga lugara.

Sakto si Aumentado,  kinahanglang dunay lokal nga ordinansa ang mga kalungsoran sa Bohol aron proteksyonan ang mga turista nga moduaw sa ilang lugar, langyaw man o lokal. Dili lang kini sa Panglao nahitabo, nahitabo sab kini sa ubang tourist destinations sa tibuok Central Visayas. Ang proteksyon sa mga turista nangahulogan og malungtarong proteksyon sab sa lokal nga turismo sa lugar. Proteksyon kini para sa mga lokal nga residenteng nanginabuhi sa turismo aron magpadayon ilang panginabuhian ug labaw sa tanan, proteksyon sa tibuok industriya sa turismo sa ilang dapit.