EDITORYAL - Panggitik aron mahalin?

Gipistahan karon sa mga netizens ug nanggawas ang nagkalain-laing mga reaksyon bahin anang mga hulagway nga nanggawas sa social media nga diin nagpakita usa ka babayeng daw ang gipasabot mao si kanhi presidente Corazon “Cory” Aquino nga nakigduwa og mahjong uban sa mga madre.

Ang maong hulagway kabahin lang sa usa ka senaryo sa salidang “Maid in Malacañang.” Ang maong salida gibituonan nilang Cesar Montano nga nagdala sa papel sa kanhi diktador Ferdinand Marcos; Ruffa Gutierez sa papel ni Imelda Marcos, Christine Reyes sa papel ni Imee Marcos ug Diego Loyzaga sa papel ni Ferdinand “Bongbong” Marcos Jr. kinsa mao na karoy pangulo sa nasud.

Ang sypnosis sa maong salida: Mao kini ang mga nahitabo sa mga Marcos 72-oras sa wala pa sila molayas gikan sa Malacañang padung sa Hawaii atol sa EDSA People Power Revolution niadtong Pebrero 1986.

Si Giselle Sanchez ang nagdala sa papel ni Aquino. Nagsuot siya og yellow nga bestida ug nag-antyohos nakigduwa og mahjong sa tulo ka mga madre.  Wala ikahimuot sa mga madre sa Carmelites Monastery sa Mabolo sa Cebu City ang maong bahin sa salida.

Bisan pa og dili parehas sa ilang abito ang gisuot sa mga madre diha sa salida apan kun ang gipasabot sa maong senaryo mao ang nahitabo niadtong Pebrero 22,2022 walay laing madre nga gikauban si Aquino anang adlawa kondili sila lang sa Carmelite Order sa Sugbu. 

Atol sa unang EDSA People Power Revolution niadtong Pebrerp 22,2022 nagtago-tago si Aquino ug ang mga lider sa oposisyon gikan sa mga tawong matud pa buot mopatay kanila.

Diha sa maong monasteyo sila nidangop ug nag-ampo uban sa mga madre. Milarga siya og balik pagkasunod adlaw padung sa Manila.

Tingali ang pagpuno og senaryo nga nagsugal si Aquino ug mga madre bunga lang sa imahinasyon sa direktor aron makadugang og gamay nga gitik o ba kaha kontrobersiya aron daghang manan-aw ang maong salida. Unsa may naa tinuod anang mahjong? Maayo tingali sa uban apan bati tan-awon kun mga madre ug si Aquino maoy magduwa unya atol pa gyud sa adlaw sa rebolusyon.

Unsa may maayong pagtulon-ang makuha sa kabataan gikan sa maong senaryo? Makiangayon ba?