EDITORYAL - Di makatarunganong tratamento

Nibalik na sab kining dili makatarunganon nga tratamento ngadto sa third sex o LGBTQ ilabi na sa mga lalaking miyembro ani nga komunidad tungod aning sakit nga monkeypox.

Ang maong sitwasyon nahitabo na sab kaniadto sa dihang misaka ang mga kaso sa HIV-AIDS o human immunodeficiency virus-acquired immune deficiency syndrome kun diin daghan sa ilang komunidad ang natakboyan sa maong makamatay nga sakit.

Karon sa kaso sa monkeypox virus, base sa rekord sa World Health Organization (WHO) kasagaran sa mga natakboyan niini mga lalaki nga nakighilawas og kaparehas nga mga lalaki.

Bisag wala tuyoa dili kalikayan nga dili maayo paminawon para sa LGBTQ community nga sila na sab maoy masentro sa pagtamay ug pagbiay-biay tungod sa sitwasyon sama sa nahitabo kaniadto sa AIDS epidemic.

Gibasol ang LGBTQ community sa pagkuyanap niini bisan dunay mga kasong dili gyud miyembro sa maong komunidad ang uban sa mga natakboyan ug aksidenteng natakboyan ang ubang nakighilawas kanila sanglit ang carrier wala masayod nga nagdala na siya niining AIDS virus. Mao kini ang klaro, ang monkeypox ug ang HIV-AIDS dili ekslusibong sakit sa LGBTQ community kondili tanang tawo mahimong matakboyan niini.

Nahitabo lang nga basi mga kasong natala karon, sagad sa mga pasyente mga lalaking miyembro sa maong komunidad, apan wala kini nagpasabot nga sila ray matakboyan niini o sila ray nagdala ug nanakod aning maong sakit. Bisan kinsa mahimong mataptan og HIV-AIDS o ba kaha Monkeypox kun dili mag-amping. Sama sa AIDS, makatakod sab ang Monkeypox dili lang pinaagi sa sex o pakighilawas. Hinuon maayo sab nga mapahibalo sa tanan lakip sa maong komunidad ang peligro gikan sa maong sakit kung dili magmatngon kun kinsa ilang ikauban sa ilang adlaw-adlaw nga kalihokan.

Kinahanglang klaruhon sa gobiyerno ug sa mga dunay kapasidad pagsabwag og impormasyon sa publiko ang kabahin sa maong sakit aron mahibalo ang publiko unsaon pagamping gikan niini.

Putlon kining sayop nga pagtuo bahin sa pakuyanap sa monkeypox sanglit bisan kinsa mahimong matakboyan o makatakod niini kun sila kuwang og impormasyon.