FOI ug ang saad

Aprobado na sa dakbayan sa Sugbo ang Freedom of Information (FOI) ordinance nga maghatag og katungod sa publiko nga makisayod sa mga transaksiyon sa kagamhanan.

Ang ordinansa nagmando sa mga opisyal ug kawani sa dakbayan sa Sugbo nga itug-an sa publiko ang mga kasayuran apil na ang mga dokumento nga angayan nilang masayran.

Ang matagbuhatan sa City Hall gimanduan ubos sa ordinansa nga motudlo og focal person nga maoy tugyanan sa pagpatuman niini.

Ang focal person maoy tahasan pagdawat sa tanang request sa mga dokumento ug ubang matang sa kasayuran ug pagsiguro nga kini mahatagan og aksiyon.

Diha sa ordinansa mahimong kasilotan sa pagkatangtang sa trabaho si bisan kinsa nga magdumili pagsanong sa request gikan sa publiko.

Dili hinuon tanang kasayuran mahimong makuha sa publiko ug sa media. Matud ni Mayor Michael Rama nga dunay exception niini.

Kadtong mga kasayuran nga gidili sa balaod nga itug-an sa publiko sama sa data privacy ug uban pa dili mahimong makuha. Gitahasan ni Rama ang city legal office paghimo sa listahan sa mga impormasyon nga dili mahimong ihatag sa publiko.

Dalaygon ang gihimo sa Konseho sa dakbayan ug ni Rama nga miuyon sa ordinansa.

Nagpakita ni nga sila komitido alang sa limpiyo nga pangobyerno sa dakbayan.

Haum ang pagpalabang sa maong ordinansa karon nga nagsingabot ang kasaulogan sa Cebu Press Freedom Week karong buwan sa Septembre.

Karon nga aprobado sa mayor ang FOI, hinaut nga ang unang lakang ni Rama pagtuman niini mao ang paghinayon sa una niyang saad nga ibulgar sa publiko ang mga tawo nga nalambigit sa anomaliya sa ginabang alang sa mga biktima sa bagyong Odette.

Wala pa kong malimot sa iyang saad nga itug-an sa publiko kinsa ang mga mapahimuslanon human sa imbistigasyon nga iyang gimando.

Apan dihang nahuman ang imbistigasyon takwahaw nausab ang iyang tenor ug mas gipili nga ililong sa publiko kinsa ang maong mga kawani ug opisyal sa City Hall.

Hinaut di tinuod ang kasayuran nga nitalaw si Rama human siya gisulong sa usa ka kanhi politiko nga iyang kaalyado og giboyboy sa suporta nga iyang nadawat sa miaging eleksiyon.

Gawas nga wala ihinayon pagbulgar ang mga pangalan sa nalambigit sa iskandalo sa financial assistance sa mga biktima sa bagyo, napugos sab kuno pag renew si Rama sa mga dumadapig sa kanhi politiko nga taktakon na unta niadtong Hunyo 30.